የሄርፒስ ቫይረስ ኢንፌክሽን (Genital herpes)

ዶ/ር መስፍን ገ/እግዚአብሔር

ሄርፒስ ብልት ላይ እና አከባቢ መቁሰል ፣ ውሃ መቋጠር ወይም መላጥ የሚያስከትል ኢንፌክሽን ነው።

ሄርፒስ ከሰው ወደ ሰው የሚተላለፈው በወሲብ በሚተላለፍ ቫይረስ አማካኝነት ነው። አንዳንድ ጊዜ ምንም አይነት ምልክት ስለሌላቸው ሰዎች ሄርፒስ እንዳላቸው ላያውቁ ይችላሉ።

ሄርፒስ እንደ አብዛኞቹ በቫይረስ አማካኝነት የሚመጡ በሽታዎች አንዴ ከያዘ ቫይርሱ ማጥፋት አይቻልም ፤ የበሽታው ምልክቶች ግን በመድሃኒቶች መቆጣጠር ይቻላል። ደግነቱ ከጥቂት አመታት በኋላ የበሽታው የህመም ሲሜቶች እየቀነሱ ይሄዳሉ።ከረጅም ጊዚያ በኋላ ቫይረሱ እዚያው ይኖራል ፤ ነገር ግን ምንም ምልክት አይኖርም። ቫይረሱ በሚያገረሽበት ጊዜ የሄርፒስ በሽታ ያለባቸው ሰዎች የሕመም ምልክቶችን ለመከላከል መድሃኒቶችን መውሰድ ይችላሉ።

የሄርፒስ ምልክቶች ምንድ ናቸው?

የበሽታው ምልክቶች ቨይረሱ ሰውነት ውስጥ በገባ ከ 2 እስከ 20 ቀናት ባሉት ጊዜዎች ይታያሉ። የሄርፒስ የበሽታ ምልክቶች የሚከተሉት ናቸዉ

● እንደ ብጉር መሰል ግን የሚያሙ በብልት ፣ በፊንጢጣ እና በመቀመጫ አከባቢዎች ይወጣሉ። በመቀጠል ብጉር መሰሎቹ ውሃ ይቋጥራሉ። የቋጠሩት ውሃ በህዋሳት የታጨቀ ነው። በ3ኛ ደረጃ ውሃ የቋጠሩት ይፈነዱና ቁስል ይሆናሉ። በዚህ ጊዜ ህዋሳቱ ለማስተላለፍ በጣም አመቺ ሁኔታ ይፈጥራል። በመጨረሻም ቁስሎቹ መድረቅ ይጀምራሉ፤ ቅርፊት ያበጃሉ ። ከቡጉር ደረጃነት እስከ ቁስል መድረቅ ድረስ እስከ 10 ቀን ጊዜ ሊወሰድ ይችላል ።

● ትኩሳት

● የጡንቻዎች መቆረጣጠም

● የእጢዎች እብጠት (ንፍፊት)

● የመሽናት ችግር

የሄርፒስ በሽታ ተጠቂ የሆኑ ሰዎች ወቅት እየለየ በሽታው ሊያገረሽባቸው ይችላል። ደግነቱ የግርሻው የህመም ስሜት እንደ መጀመርያው ከባድ አይሆንም እናም ረጅም ጊዜ አይቆይም። ግርሻው በየወሩ ወይም በተደጋጋሚ ሊከሰት ይችላል ወይም በዓመት አንዴ ወይም ሁለት ጊዜ ሊከሰት ይችላል።

አንዳንድ ጊዜ የሄርፒስ ግርሻ መቼ እንደሚከሰት ሰዎች ሊያውቁት ይችላሉ ፤ ምክንያቱም ቀድመው ብልታቸው አከባቢ የመደንዘዝ ስሜት ወይም ህመም ይሰማቸዋል።

አንዳንድ ሁኔታዎች የሄርፒስ ግርሻ የመከሰቱ አጋጣሚ ከፍተኛ ያደርጉታል። እነዚህም ውጥረትን ፣የፀሐይ ብርሃን፣ የወር አበባ እና ጽኑ ህመም ናቸዉ።

ዶክተር ወይም ነርስ ማየት አለብኝ?

ምልክቶችን ለመጀመሪያ ጊዜ ሲመጡ ወይም ምልክቶቹ ከባድ ከሆኑ ዶክተርዎን ወይም ነርስዎን ያማክሩ። ሐኪሞችዎ ምልክቶችን ለመቀነስ እና ግርሻው በፍጥነት ለማከም የተለያዩ መድሃኒቶችን ሊሰጡዎ ይችላሉ።

የህመም ስሜት እንዲቀንስ በራሴ ማድረግ የምችለው ነገር አለ?

አዎ የሚከተለውን ማድረግ ይችላሉ

● ለ20 ደቂቃዎች ያህል ሞቅ ባለ ውሃ ውስጥ ይዘፍዘፉት (Sitz bath)

● የብልትዎን ንጽህና ይጠብቁ ፣ ደረቅ መሆኑን ያረጋግጡ እና ጥብቅ ያሉ የውስጥ ልብሶችን አይልበሱ

● እንደ ታይሌኖል ወይም ibuprofen መድሃኒት መውሰድ። ነገር ግን አስፕሪን ከመውሰድ ይቆጠቡ።

እርጉዝ ከሆንኩስ?

ከነፍሰጡር ሴቶች ወደ ጽንሱ የሚተላለፉት ቫይረሶች አዲስ በተወለዱ ህጻናት ላይ ከባድ ጉዳት ሊያደርሱ ይችላሉ። በመሆኑም እርጉዝ ከሆኑ ከሐኪምዎ ጋር ይነጋገሩ።

ወደ ጾታ ጓደኛዬ እንዳይሰራጭ ለመከላከል ምን ማድረግ እችላለሁ?