NEWS: የመንግስት “ቪ8” መኪኖች ከዛሬ ጀምሮ ከመስክ ስራ ውጭ አገልግሎት ላይ እንደማይውሉ መንግስት አስታወቀ::

የመንግስትን “ቪ ኤይት” ሞቶር መኪኖችን ከመስክ ስራ ውጭ አገልግሎት ላይ እንዳይውሉ ከዛሬ ጀምሮ እገዳ መጣሉን የመንግስት ግዢና ንብረት ማስወገድ አገልግሎት አስታወቀ፡፡

የአገልግሎቱ ዋና ዳይሬክር አቶ ይገዙ ዳባ የመንግስት ባለስልጣናት በከተማ የሚገለገሉት በአገር ውስጥ የተገጣጠሙ ነዳጅ ቆጣቢ መኪኖችን ብቻ እንደሚሆን ገልጸዋል፡፡

ለባለስልጣናት የሚገዙት አዳዲሶቹ ተሸከርካሪዎች በሶስት የሞተር ደረጃ የተመደቡ ሲሆን፣ ከስምንት መቶ ሰባት ሺህ እስከ አንድ ነጥብ አንድ ሚሊዮን ብር ዋጋ የሚገዙ ይሆናል ተብሏል፡፡

ቀደም ሲል አንድ “ቪ ኤይት” መኪናን ለመግዛት እስከ 5.5 ሚሊዮን ብር መንግስት ያወጣ ነበር ያሉት የመንግስት ግዢና ንብረት ማስወገድ አገልግሎት ዋና ዳይሬክተሩ፣ አሁን ላይ ተግባራዊ ይደረጋል የተባለው አሰራር ግን ባነሰ ዋጋ መኪኖችን ለመግዛት እንደሚያስችል ገልጸዋል፡፡

አሰራሩ የተሻሻለው ከሚንስትር ደረጃ ጀምሮ የሚገኙ የስራ ሃላፊዎች የተሽከርካሪ ግዢ አዲስ አሰራር አስመልክቶ በሐምሌ 2009 ዓ.ም በሚኒስሮች ምክር ቤት የጸደቀውን አዋጅ መሰረት በማድረግ መሆኑን ተነግሯል፡፡

አሰራሩም እስካሁን ይገዙ የነበሩትን ባለ ስምንት ሲሊንደር “ቪ ኤይ ጂ ናይን ፓጃሮ “የሚባሉትን ባለከፍተኛ ጉልበት ሞተር መኪኖችን ግዢ የሚያስቀር ነው፡፡

የመንግስት ግዢና ንብረት ማስወገድ አገልግሎት አሰራሩን ተግባራዊ ለማድረግ በቂ ጥናት ማድረጉን ገልጾ አሁን ላይ ያሉ የመንግስት “ ቪ8” እና መሰል መኪኖች ወደ አንድ ማዕከል ተሰባስበው ለመስክ ስራ ይውላሉ ብሏል፡፡

ኢቢሲ እንደዘገበው የመንግስት ወጪን መቀነስ የ2011 ዓ.ም ቁልፍ ትኩረት መሆኑን ጠቅይ ሚኒስትር ዶ/ር ዐቢይ አህድ መግለጻቸው ይታወሳል፡፡

ምንጭ: Amhara Mass Media Agency

Advertisement

1 Comment

Comments are closed.