NEWS: ጠቅላይ ሚኒስትር ዶ/ር አብይ አህመድ በቻይና የነጻ ትምህርት ዕድል ላገኙ ሰልጣኞች ሽኝት አደረጉ

ጠቅላይ ሚኒስትር ዶክተር አብይ አህመድ በቻይና የነጻ ትምህርት ዕድል አግኝተው ለሚሄዱ የረጅም እና የአጭር ጊዜ ሰልጣኞች ሽኝት አደረጉ።

ጠቅላይ ሚኒስትር ዶክተር አብይ ትናንት ማምሻውን በድንገት በሽራተን ሆቴል ተገኝተው በእሳቸው ጥያቄ በቻይና የነጻ ትምህርት ዕድል አግኝተው የሚሄዱ ሰልጣኞችን ነው የሸኙት።

ጠቅላይ ሚኒስትር ዶክተር አብይ በዚሁ ጊዜ፥ በዘንድሮው ዓመት 1 ሺህ ሰልጣኞችን ወደ ቻይና ለትምህርት መላክ ተችሏል፤ ይህ እንዲሳካ አስተዋጽኦ ላበረከቱ በኢትዮጵያ የቻይና አምባሳደር ታን እና ለኢኮኖሚ አማካሪዋ ሚስስ ሊው ምስጋና ይገባቸዋል ብለዋል።

ወደ ቻይና ለሚጓዙ ሰልጣኞች ባስተላለፉት መልእክትም፥ “በቻይና በሚኖራችሁ ቆይታ በተቻለ መጠን የስራ ባህላቸውን፣ በምን እንዳደጉ እና የእነሱን መልካም ባህሪያት አውቃችሁ ወደ ሀገር ስትመለሱ ልታስተምሩን ይገባል” ብለዋል።

ጠቅላይ ሚኒስትር ዶክተር እብይ አክለውም፥ በጉዟችሁ እንደ ጥሩ ዲፕሎማት በመሆን በኢትዮጵያ እና በቻይና መካከል ያለውን ግንኙነት ይበልጥ የማጠናከር ስራ እንደምትሰሩ እምነት አለኝ ሲሉም ተናግረዋል።

ለትምህርት ወደ ቻይና ለሚሄዱ ሰልጣኞች መልካም የትምህርት ጊዜ እንዲሆን የተመኙት ጠቅላይ ሚኒስትር ዶክተር አብይ፥ የተጀመረው የሰው ሀይል ግንባታ ስራ በሀገር ውስጥም በውጪም ተጠናክሮ ይቀጥላል ብለዋል።

ነፃ የትምህርት እድል አግኝተው ወደ ቻይና የሚያቀኑት ተማሪዎቹም 50 የሁለተኛ እና የሶስተኛ (ዶክትሬት) ዲግሪ፣ 100 የበትረ-ሳይንስ የመጀመሪያ ዲግሪ፣ 50 ከዓመቱ የወርቅ ሜዳሊያ ተመራቂዎች የተመረጡ ናቸው።

እንዲሁም 50 ከኪነ-ጥበብ ባለሙያዎች የተመረጡ ሲሆን፥ በድምሩ 250 መሆናቸውን የጠቅላይ ሚኒስትር ጽህፈት ቤት ልዩ ሀላፊ አቶ ፍጹም አረጋ በትዊተር ገጻቸው አስታውቀዋል።

ነፃ የትምህርት እድል ያገኙት ሰልጣኞች ከሚቀጥለው ሳምንት ጀምሮ ወደ ቻይና እንደሚያቀኑ የሚጠበቅ ሲሆን፥ ይህም የሁለቱን ሀገሮች ህዝቦች ትስስር እንደሚያጠናክር ይጠበቃል ብለዋል አቶ ፍጹም።

ምንጭ: ኤፍ ቢ ሲ(FBC)

Advertisement

1 Comment

Comments are closed.