NEWS: የባህር ዳር ዩኒቨርሲቲ ማሪታይም አካዳሚ 71 የመርከብ ባለሙያዎችን አስመረቀ

የባህር ዳር ዩኒቨርሲቲ ማሪታይም አካዳሚ ለ16ኛ ጊዜ ያሰለጠናቸውን 71 የመርከብ ኤሌክትሪካል ቴክኒሺያን ባለሙያዎችን ማስመረቁን አስታወቀ፡፡

ተመራቂዎቹ ከዚህ ቀደም በኤሌክትሪካልና በኤሌክትሮ መካኒካል ኢንጅነሪንግ የሙያ መስክ የመጀመሪያ ዲግሪያቸውን ከተለያዩ ዩኒቨርሲቲዎች የያዙ ናቸው ተብሏል፡፡

በዚህም ባለፉት ስድስት ወራት በዩኒቨርስቲ ቆይታቸው የመርከብ ቴክኒሺያን ለመሆን የሚያበቃቸውን በተግባር የተደገፈ እውቀትና ክህሎት የጨበጡ መሆናቸውም ተገልጿል፡፡

አካዳሚው ገበያው የሚፈልገውን የሰው ኃይል አሰልጥኖ በማቅረብ የሀገሪቱን እድገት እየደገፈ እንደሚገኝ የባህር ዳር ዩኒቨርሲቲ ፕሬዝዳንት ዶክተር ፍሬው ተገኝ ጠቅሰዋል፡፡

አካዳሚው በዓለም ደረጃ ያለውን የገበያ ፍላጎትና በመርከብ ኢንዱስትሪ ያለውን ክፍተት ለመሙላት ከእስራኤል መንግስት ጋር በመተባበር ሙያተኞችን እያፈራ ይገኛል ብለዋል።

አካዳሚው እስካሁን ከ1100 በላይ ባለሙያዎችን አስመርቋል፤ እንዲሁም በአውሮፓ፣ አሜሪካና ሌሎች አህጉራት በሚገኙ የመርከብ ካምፓኒዎች ውስጥ እያስቀጠራቸው እንደሚገኝም ተገልጿል፡፡

ምንጭ: ኢዜአ

Advertisement

1 Comment

Comments are closed.