NEWS: ኦህዴድ መጠሪያውን ወደ “የኦሮሞ ዴሞክራሲያዊ ፓርቲ” ለመቀየር ሀሳብ መቅረቡ ተገለፀ

 

የኦሮሞ ህዝብ ዴሞክራሲያዊ ድርጅት /ኦህዴድ/ መጠሪያውን ወደ “የኦሮሞ ዴሞክራሲያዊ ፓርቲ” ለመቀየር ሀሳብ መቅረቡ ተገለፀ።

የኦህዴድ የገጠር ፖለቲካና አደረጃጀት ዘርፍ ሀላፊ አቶ አዲሱ አረጋ እንደገለጹት፥ አህዴድ የስያሜ እና የአርማ ለውጥ ለማድረግ ሀሳብ ቀርቧል።

በዚህም መሰረት አዲሱ የኦሮሞ ህዝብ ዴሞክራሲያዊ ድርጅት /ኦህዴድ/ መጠሪያ “የኦሮሞ ዴሞክራሲያዊ ፓርቲ” እንዲሆን ሀሳብ መቅረቡን ነው አቶ አዲሱ ያስታወቁት።

ከዚህ በተጨማሪም ኦህዴድ ከዚህ ቀደም ሲጠቀምበት የነበረውን አርማም ለመቀየር ሀሳብ መቅረቡን ያነሱት አቶ አዲሱ፥ ለዚህም ሶስት አርማዎች በአማራጭነት መቅረባቸውን አስታውቀዋል።

በዚህ ጉባዔ አሁን የተገኘዉ ለዉጥ በተደራጀ እና ህዝቡን ባሳተፈ መልኩ ለማስቀጠል አመራሩ በአንድነት መንፈስ መስራት እንዳለበት የኦህዴድ ማዕከላዊ ጽህፈት ቤት ሀላፊ ወይዘሮ አዳነች አቤቤ ተናግረዋል።

በክልልና በድርጅት ለውጡ በምን ደረጃ ላይ ይገኛል፣ እንዴት መጣ፣ ህብረተሰቡን ባሳተፈ ሁኔታ እንዴት ማስቀጠል ይቻላል በሚሉ ጉዳዮች የኦህዴድ ከፍተኛ አመራሮች የተሳተፉበት ውይይት እየተካሄደ ይገኛል።

በዚህ ወቅት ድርጅቱ ለአንድ ወር ከ15 ቀናት የክትትልና ግምገማ በክልሉ በሚገኙ 16 ዞኖች 12 ከተማ አስተዳደሮች ማካሄዱ ተገልጿል።

በግምገማው ወጣቱን እና ህብረተሰቡን ባሳተፈ መልኩ ስራዎች እየተሰሩ ቢሆንም ውስንነቶች እንዳሉ ተገልጿል።

እነዚህ ውስንነቶች የለውጡ መሪዎች ላይ እምነት ማጣት፣ ጥቅማቸውን ለማስጠበቅ ሲሉ በሌሎች አካላት መጠቀሚያ መሆን፣ ከችግር ለመሸሽ መሞከር መሆናቸው ተለይተዋል።

ህብረተሰቡም እየተያ ባለው ለውጥ ደስተኛ ቢሆንም የፀጥታ ችግር በሚከሰትበት ወቅት ስጋት ውስጥ መግባት፣ ፈጣን ለውጥ መፈለግ፣ በልማት ስራ መቀዛቀዝ እና በይቅርታ የወጡ ታራሚዎች በሌሎች ላይ የበቀል እርምጃ ለመውስድ ጥረት ማድረግ በግምገማው የተለዩ ችግሮች ናቸው ተብሏል።

እንዲሁም የተለያዩ መንገዶች በመጠቀም የተጀመረውን ለውጥ ወደ ኋላ ለመጎተት የሚጥሩ አካላት እንዳሉም ተገምግሟል።

በመሆኑን ይህን ችግር ለመቅረፍ ህብረተሰቡ፣ ወጣቱ እና አመራሩ በግምባር ቀደምትነት መሰለፍ እንደሚገባቸው ወይዘሮ አዳነች ሀቤቤ አሳስበዋል።

በቀጣይ በተዋረድ ያለው አመራርና የህብረተሰብ ክፍል በማወያየትና የገዳ ስርዓትን በመከተል ከብሄር ብሄረሰቦች ጋር በአንድነት መቆም ያስፈልጋል ተብሏል።

አቶ አዲሱ አረጋ ባሳለፍነው አርብ፥ ኦህዴድ በያዝነው የነሃሴ ወር ድርጅታዊ ጉባዔውን እንደሚያካሂድ መጠቆማቸው ይታወሳል።

በጉባዔውም ኦህዴድ የደረሰበትን የትግል ምዕራፍ ከግንዛቤ በማስገባት የስያሜ፣ የዓርማ እና ድርጅታዊ መዝሙሩን በአዲስ ሊቀይር እንደሚችል ጠቁመዋል።

ምንጭ: ኤፍ ቢ ሲ(FBC)

Advertisement

1 Comment

Comments are closed.