NEWS: ‹‹የአሰብ ወደብ ሸቀጦች እና የሀገር ውስጥ ምርቶች በርካሽ ዋጋ እንዲገቡ እና እንዲወጡ ያስችላል›› ምሁራን

በቢኒያም መስፍን

ኢትዮጵያ ከኢኮኖሚ እድገቷ ጋር ተያይዞ እየጨመረ የመጣውን የአቅርቦት ፍላጎቷን ለማርካት የአሰብ ወደብ ከፍተኛ ጥቅም እንዳለው ዘ ኢትዮጵያን ሄራልድ ያነጋገራቸው የኢኮኖሚ ምሁራን ተናገሩ፡፡

ኢትዮጵያ ባለፉት አስር ዓመታት ከፍተኛ የኢኮኖሚ እድገት ስታስመዘግብ በመቆየቷ ወደቦችን የመጠቀም ፍላጎቷ እጅግ አሻቅቧል፡፡

የጅቡቲ ወደብን ለመጠቀም ተገዳ የነበረችው ሀገራችን እንደአማራጭ የኬንያ፣የሱዳን እና የሶማሊያ ወደቦችን ለመጠቀምም ስምምነት ላይ ደርሳ ነበር ይላል ዘገባው፡፡
የአሰብ ወደብ ለኢትዮጵያ የሚኖረውን ኢኮኖሚያዊ ጠቀሜታ በተመለከተ በአዲስ አበባ ዩኒቨርሲቲ የፐብሊክ ፖሊሲ ፕሮፌሰር ዶ/ር ቆንስጣንጢኖስ ብሩህተስፋ እንዳብራሩት የጂቡቲ ወደብ እጅግ የተጨናነቀ በመሆኑ ኢትዮጵያ በበቂ ሁኔታ እየተገለገለችበት አይደለም ብለዋል፡፡

የአሰብ ወደብ የተሻለ አማራጭ መሆኑን እና በሰሜናዊ ኢትዮጵያ በኩል ሸቀጦች እና የሀገር ውስጥ ምርቶች በርካሽ ዋጋ እንዲገቡ እና እንዲወጡ የሚያስችል እንደሆነ ገልጸዋል፡፡
ከዚህ ባለፈ ለኤርትራ ኢኮኖሚ መነቃቃት የአሰብ ወደብ ስራ መጀመር ጉልህ ድርሻ እንደሚኖረው ጠቅሰው በኢትዮጵያ ያሉትን የማዕድን ሀብቶች በተመጣጣኝ ዋጋ ለዓለም ገበያ ለማቅረብ ወደቡ ጠቃሚ ነው ብለዋል፡፡

የጅቡቲ ወደብ ለሰሜናዊው ኢትዮጵያ ክፍል እጅግ ሩቅ በመሆኑ ተጨማሪ ወጭ ሲያስወጣ መቆየቱን ተናግረው ዕቃዎችን ለማመላለስ በውድ ዋጋ የሚገነቡ የባቡር መስመሮች እንደሚያስፈልጉ ገልጸዋል፡፡
የአሰብ ወደብ ግን ለሰሜናዊ ኢትዮጵያ ቅርብ በመሆኑ እቃዎችን በርካሽ ዋጋ መላክ እና ማስገባት ያስችላል ነው ያሉት ፕሮፌሰሩ፡፡

ኢትዮጵያ የጅቡቲ ወደብን ብቻ አማራጭ አድርጋ መቆየቷ ትክክል እንዳልነበር እና ተጨማሪ የወደብ አማራጮችን መፈለግ ተገቢ መሆኑን አሰገንዝበዋል፡፡

ረዳት ፕሮፌሰር ተሾመ አዱኛ በበኩላቸዉ የአሰብ ወደብ ካለው መልክዓ-ምድራዊ ቅርበት የተነሳ እቃዎችን ወደ ዉጭ በመላክ ዓለምአቀፍ ተወዳዳሪነትን ያጠናክራል ብለዋል፡፡
አትዮጵያ ወደ ውጭ በምትልካቸው እቃዎች እና ሸቀጦች ላይ የዋጋ ውድነት ዋነኛ ችግር እንደሆነ ጠቅሰው የአሰብ ወደብን መጠቀም በርካሽ የማጓጓዣ ዋጋ ኤክስፖርት እንድታደርግ በር ይከፍትላታል ነው ያሉት፡፡ የነዳጅ ዘይት ምርቷንም ለዓለም ገበያ ለማቅረብ ያስችላታል ብለዋል፡፡

በጅቡቲ ወደብ ለሚሰጠው አገልግሎት በየጊዜው ምክንያታዊ ያልሆነ የዋጋ ጭማሪ ሲደረግ መቆየቱን ጠቅሰው ይህም የዋጋ ውድነት ሲያስከትል መቆየቱን ዶ/ር ተሾመ ተናግረዋል፡፡
የአሰብ ወደብ አገልግሎትን በተመለከተ የኤርትራ መንግስት ያልተገባ ጭማሪ ያደርጋል ተብሎ እንደማይታሰብ ገልጸዋል፡፡

የአሰብ ወደብ ዘመናዊ የመሰረተ ልማቶች እንዳልተሟሉለት ገልጸው ኢትዮጵያ እና ኤርትራ በጋራ ተገቢውን መሰረተ ልማት በመገንባት የውጭ ንግድ ተሳትፏቸውን ማሳደግ ይችላሉ ሲሉ ረዳት ፕሮፌሰሩ ተናግረዋል፡፡

በጅማ ዩኒቨርሲቲ ረዳት ፕሮፌሰር የሆኑት ዶ/ር ወንዳፈራሁ ሙሉጌታ ደግሞ የአሰብ ወደብ ኢትዮጵያ በሰሜናዊዉ ክፍል እየገነባቻቸው ካሉት የኢንዱስትሪ ፓርኮች የሚወጡ ምርቶችን በቀላሉ ወደ ውጭ ለመላክ ያስችላታል ብለዋል፡፡

እያደገ ለመጣዉ የኢትዮጵያ ኢኮኖሚ የጅቡቲ እና የአሰብ ወደቦች ብቻ በቂ አለመሆናቸውን የገለጹት ዶ/ር ወንዳፈራሁ ተጨማሪ የወደብ አማራጮች ሊኖሯት እንደሚገባም ጠቁመዋል፡፡

ግልጽ እና ቀልጣፋ ሆኖ በዘመናዊ ቴክኖሎጂ እና በተማረ የሰው ሀይል የሚመራ የገበያ ስርዓት መመስረት የሁለቱን ሀገራት ኢኮኖሚ ለማጠናከር ጉልህ ድርሻ አለው ብለዋል ምሁራኑ፡፡

ምንጭ:  Amhara Mass Media Agency

 

Advertisement

1 Comment

Comments are closed.