NEWS: የኢንጅነር ስመኘው በቀለ ሞትን ተከትሎ በጎንደር ረብሻ ተከሰተ

የታላቁ ሕዳሴ ግድብ ሥራ አስኪያጅ ኢንጅነር ስመኘው በቀለን ህልፈት ተከትሎ ዛሬ በጎንደር ከተማ ረብሻ እንደነበረ የጎንደር ከተማ ከንቲባ አቶ ተቀባ ተባበል ለቢቢሲ ገለጹ።

አለመረጋገቱ “ለኢንጅነሩ ሞት ተጠያቂ የሆኑ ሰዎች ለፍርድ ይቅረቡ” በሚል የተቀሰቀሰ ሲሆን ትላንት አንድ የሰላም አውቶብስ መቃጠሉን ከንቲባው ገልጸዋል።

ዛሬ ረፋድ ላይ የተጀመረው ሰልፍ ለሰአታት ዘልቋል። ሰልፉን ያካሄዱ ሰዎች ላይ አስለቃሽ ጭስ ተተኩሶም ነበር።

የተጎዳ ሰው ባይኖርም ሰልፉ በተካሄደበት አካባቢ አንድ ሱቅ ላይ በድንጋይ ጉዳት ደርሷል።

ስለኢንጂነር ስመኘው አሟሟት እስካሁን ምን እናውቃለን?

“የእሱ አባት ኩራዝ የላቸውም፤ እሱ ግን ኢትዮጵያን ሊያበራ ነው የሞተው”

ኢንጂነር ስመኘው በቀለ ሕይወታቸው ያለፈው በጥይት ተመተው ነው፡ ፌደራል ፖሊስ

የአሜሪካ ኤምባሲም ዜጎቹ ወደ ጎንደር እንዳይሄዱ የጉዞ እገዳ ማስጠንቀቂያ አስተላልፏል።

ከንቲባው በበኩላቸው “ያልተፈቀደና ባለቤት የሌለው” ካሉት የዛሬው ሰልፍ ጀርባ ያሉት ሰዎች እንዳልታወቁ ገልጸውልናል።

“ትላንት የነበረው ሁኔታ ኢንጅነር ስመኘው እዚሁ አካባቢ ተወልዶ ከማደጉ ኣንጻር በመሞቱ ሀዘን ለመግለጽ እንጂ ሌላ አጀንዳ አልነበረውም። ሆኖም አጋጣሚውን በመጠቀም ጎንደርን ለመበጥበጥ የሚፈልጉ ሊጠቀሙበት ሞክረዋል” ሲሉ ከንቲባው ተናግረዋል።

ማህበራዊ ሚዲያ ላይ አለመረጋጋቱን ተከትሎ ሰዎች እንደተጎዱ፣ ንብረትም እንደወደመ እንዲሁም የእለት ከእለት እንቅስቃሴ መስተጓጎሉን ብዙዎች እየገለጹ ይገኛሉ።

የተጎዳ ሰው ስለመኖሩና የንብረት ውድመስ ስለመድረሱ ከንቲባውን ስንጠይቃቸው የተጎዳ ሰው እንደሌለና ከተሰበረው ሱቅ ውጪ ሌላ ንብረት ላይ ጉዳት እንዳልደረሰ ገልጸውልናል።

ከንቲባው ከሰአት ነገሮች መረጋጋታቸውን ገልፀው ረብሻው የከተማዋ ኢኮኖሚ ላይ ተጽእኖ እንደማያሳድርም አክለዋል።

ትላንት ከሰአት የኢንጅነሩን አባት፣እህት፣ የአክስት ልጆችና ሌሎችም ቤተሰቦች በመቀላቀል ሀዘናቸውን የገለጹ የከተማዋ ነዋሪዎች ነበሩ። ከከተማዋ ነዋሪዎች መሀከል ወደ አዲስ አበባ የሚያቀኑ የኢንጅነሩን ቤተሰቦቹን በማጀብ ሀዘናቸውን ያስተጋቡም ነበሩ።

ትላንት አመሻሽ ላይ በዛሬው እለት የተቃውሞ ሰልፍ ለማድረግ ጥሪ የሚያቀርብ በራሪ ወረቀት ተበተነ።

ከንቲባው እንደሚሉት በራሪ ወረቀቱን ያሰራጩ ሰዎች ማንነት እስካሁን አልታወቀም።

ከንቲባው ሰልፉን የጠሩትንና ያካሄዱትን ሰዎች “ጎንደርን ወደቀደመው አለመረጋጋት ለመክተት ሞክረዋል” ቢሉም ለኢንጅነር ስመኘው ህልፈት ተጠያቂ የሆኑ ሰዎች ለፍርድ ይቅረቡ የሚል መልእክት ያዘለ እንደሆነ እየተነገረ ነው።

የአሜሪካ ኤምባሲን ማስጠንቀቂያ በተመለከተ ዛሬ ጠዋት የኤምባሲው መግለጫ ቢደርሳቸውም የከተማዋን መረጋገት በማየት እገዳው እንደሚነሳ ተስፋ እንደሚያደርጉ አቶ ተቀባ ተናግረዋል።

ከዚህ ቀደም በተፈጠረው አለመረጋጋት የከተማዋ የቱሪስተ ፍሰት ማሽቆልቆሉ ይታወሳል።

ምንጭ: ቢቢሲ

Advertisement

1 Comment

Comments are closed.