Customs Seizes $10,000 At Bole Airport, Addis Abeba | በህገወጥ መንገድ ከሃገር ሊወጣ የነበረ 10ሺህ የአሜሪካን ዶላር በቁጥጥር ስር ዋለ

ገንዘቡ ትናንት ሐምሌ 17 ቀን 2010 ዓ.ም በቦሌ ዓለም አቀፍ አየር ማረፊያ በኩል ወደ ውጭ ሊወጣ ሲል በተደረገ ፍተሻ መያዙ ተገልጿል።

ግለሰቦች በየቤታቸው ያከማቹትን የውጭ ምንዛሬ በባንክ እንዲመነዝሩ ጥሪ ማስተላለፉን ተከትሎ በህገወጥ መንገድ ገንዘብ ወደ ውጭ ለማስወጣት እየሞከሩ ነው መሆኑን የኢትዮጵያ ገቢዎችና ጉምሩክ ባለስልጣን የኮሙኒኬሽን ጉዳዮች ዳይሬክተር አቶ ኤፍሬም መኮንን ገልጸዋል፡፡

በመሆኑም የኢትዮጵያ ገቢዎችና ጉምሩክ ባለስልጣንም እነዚህን ህገወጦች ለመከላከል በልዩ ሁኔታ እየተንቀሳቀሰ እንደሚገኝ ተናግረዋል።

በዚህም በቦሌ ዓለም አቀፍ አየር ማረፊያ በኩል በህገወጥ መንገድ ከሃገር ሊወጣ የነበረ 10 ሺህ የአሜሪካን ዶላርና 3ሺህ950 የኢትዮጰያ ብር በቁጥጥር ስር መዋሉን ገልጸዋል።

እየተደረገ ያለውን ፍተሻና ቁጥጥር ህብረተሰቡ እየደገፈ እንደሚገኝ የተናገሩት አቶ ኤፍሬም ከዚህ በፊት በፍተሻ ጣቢያዎች በርካታ ህገ ወጥ ገንዘብና ሌሎች ውድ እቃዎች በህብረተሰቡ ጥቆማ መሰረት ከአገር ሊወጣ ሲል መያዙን ጠቁመዋል።

በተጨማሪም ከውጭ ወደ አገር ውስጥ ሊገቡ የነበሩ ሀሰተኛ የኢትዮጵያ የብር ኖቶች በፍተሻ እየተያዙ መሆኑን የኢዜአ ዘገባ ያስረዳል።

የውጭ ምንዛሬ በቤታቸው ያከማቹ ግለሰቦችም ከአገር ከማስወጣት ይልቅ ገንዘባቸውን በባንክ በመመንዘር የቀረበውን አገራዊ ጥሪ በመቀበል የራሳቸውን ከህገወጥ ድርጊት መጠበቅ እንዳለባቸው አሳስበዋል።

ህገ ወጦችን በማጋለጥ ረገድ ህብረተሰቡ እያደረገ ያለውን እገዛ አጠናክሮ እንዲቀጥል ጠይቀዋል።

ምንጭ: EBC

Advertisement

1 Comment

Comments are closed.