NEWS: ትራምፕና ሮሃኒ ውዝግብ ውስጥ ገብተዋል

የዩናይትድ ስቴትስ ፕሬዚደንት ዶናልድ ትራምፕና የኢራኑ አቻቸው ሃሰን ሮሃኒ ሰሞኑን ከንግድ ውዝግብ ጋር በተያያዘ በሀገራቱ መካከል ያለው ውጥረት እየጨመረ መምጣቱ እየተነገረ ነው፡፡

ፕሬዚደንት ሮሃኒ ከኢራን ጋር የሚደረግ ጦርነት ምናልባት የዓለም ትልቁ ጦርነት ይሆናል ብለዋል፡፡

ይህንንም ተከትሎ ፕሬዚደንት ትራምፕ በትዊተር መልዕክታቸው ኢራን ሀገራቸው ላይ የምትዝት ከሆነ ውጤቱ ፍጹም አደገኛ ሊሆን እንደሚችል አስጠንቅቀዋል፡፡

ዩናይትድ ስቴትስ ከ2015ቱ የኒውክሌር ስምምነት እራሷን ማግለሏን ተከትሎ በሁለቱ ሀገራት መካከል ያለው ውጥረት ከጊዜ ወደ ጊዜ እየባሰበት ይገኛል፡፡

ይህንንም ተከትሎ ዩናይትድ ስቴትስ ከኢራን ጋር በንግድ የሚወዳጁ ሀገራትን በማዕቀቡ ምክንያት ግብይት እንዲያቆሙ ማስጠንቀቃቸው ይታወሳል፡፡

የዩናይትድ ስቴትስ የውጭ ጉዳይ ሚኒስትር ማይክ ፖምፔዮ የኢራን መንግስትን መንግስት ከማለት ይልቅ ለማፍያ የቀረቡ ናቸው ሲሉ የመረረ አቋማቸውን አሰምተዋል፡፡

የውጭ ጉዳይ ሚኒስትሩ በሀገሪቱ ላይ ግፊት ለማሳደር በህዳር ወር ከኢራን ወደ ሀገራቸው ነዳጅ የሚያስገቡ ሀገራት የንግድ ወዳጅነታቸውን እንዲገቱ የማድረግ ፍላጎት እንዳላቸው አስታውቀዋል፡፡

ፕሬዚዳንት ሮሃኒ በበኩላቸው በሀገራቸው ላይ የሚሰነዘር ማንኛውም ግፊት ኢራናውያንን የበለጠ እንዲጠነክሩና አንድ አንዲሆኑ ያደርጋቸዋል ብለዋል፡፡

እንዲሁም ወደ ተለያዩ ሀገራት ነዳጅ መላኳን ዩናይትድ ስቴትስ ልታስቆማት እንደማትችልም ተናግረዋል፡፡

በመጨረሻም ሮሃኒ ለትራምፕ “ከአንበሳ ጭራ ጋር አይጫወቱ መጨረሻ ላይ ይጸጽቶታል የሚል ማስጠንቀቂያ አስተላልፈዋል፡፡

ምንጭ: ኤፍ ቢ ሲ(FBC)

Advertisement

1 Comment

Comments are closed.