NEWS: የኦሮሚያና የኢትዮጵያ ሶማሌ ክልሎች በአጎራባች አካባቢዎቻቸው የፌዴራል የጸጥታ አካላት ገብተው የማረጋጋት ሥራ እንዲሰሩ ተስማሙ

አዲስ አበባ፣ ሐምሌ 9፣ 2010 (ኤፍቢሲ) የኢፌዴሪ ጠቅላይ ሚኒሰትር ዶ/ር አብይ አህመድ ዛሬ በሰጡት ትዕዛዝ መሰረት የኦሮሚያና የኢትዮጵያ ሶማሌ ክልል ርዕሳና መስተዳደሮች በክልሎቹ አጎራባች አካባቢዎች የፌዴራል የጸጥታ አካላት በአፋጣኝ ገብተው የሰላምና መረጋጋት ሥራ እንዲሰሩ ተስማሙ።

ጠቅላይ ሚኒሰትር ዶ/ር አብይ አህመድ አልፎ አልፎ የሚታየው የዜጎች ሕይወት መጥፋት እንዲቆም፣ ይህንን የሚያባብሱ አካላት ከድርጊታቸው እንዲቆጠቡ፣ በአጠቃላይ አሁን የተፈጠረውን ብሩህ ተስፋ ለማስቀጠል በፍቅርና አብሮነት ሕዝቡ እንዲተጋ፤ ከዚህ በተቃራኒው የሚፈጸሙ ተገቢ ያልሆኑ ድርጊቶችን ለመከላከል የኢፌዴሪ መከላኪያ ሠራዊትና የፌዴራል ፖሊስ ሕግ የማስከበር ሥራቸውን በኃላፊነት ስሜት እንዲወጡ ትዕዛዝ መስጠታቸው ይታወቃል።

ጠቅላይ ሚኒሰትሩ የሰጡትን መመሪያ ተሪከትሎም የኦሮሚያ ክልል ርዕስ መስተዳደር አቶ ለማ መገርሳና የኢትዮጵያ ሶማሌ ክልል ርዕሰ መስተዳደር አቶ አብዲ መሐመድ ዑመር ውይይት አድርገዋል።

በውይይታቸውም ግጭት በተፈጠርባቸው አጎራባች አካባቢዎች የፌዴራል የጸጥታ ኃይል በመግባት የጸጥታ፣ የሠላምና መረጋጋት ሥራ እንዲሰራ፤ እንዲሁም የሕግ ማስከበር ኃላፊነቱን እንዲወጣ መስማማታቸውን የመንግስት ኮሙዪኒኬሽን ጉዳዮች ፅህፈት ቤት ለፋና ብሮድካስቲንግ ኮርፖሬት በላከው መግለጫ አስታውቋል።

ለአፈጻጸሙ የሁለቱም ክልል የመንግሥት መዋቅሮች ከፌዴራል የጸጥታ አካላት ጋር በመቀናጀት ችግሩን ለመፍታት አስፈላጊውን ሁሉ እንደሚወጡ ርዕሳና መስተዳደሮቹ ማረጋገጣቸውን የመንግሥት ኮሙዩኒኬሽን ጉዳዮች ጽ/ቤት ኃላፊ ሚኒሰትር አቶ አህመድ ሺዴ ገልጸዋል።

በተለይ የሕግ-ተጠያቂነትን ለማረጋገጥ እንደሚሰራና የሁለቱም ክልል ሕዝብ እንደወትሮው የለውጥ ሂደቱን በመጠበቅ ለመፍትሄው ኃላፊነቱን በተገቢው መንገድ እንዲወጣ ጥሪ አቅርበዋል።

በቀጣይ በበርካታ እሴቶች የተሳሰረውን የሁለቱ ክልል ሕዝብ ከመሰል ግጭቶች በመከላከል ለዘላቂ መፍትሄ፣ ለሰላምና ፍቅር አብሮ የሚሰራበትን ሁኔታ ለማስቀጠል ተከታታይ የሕዝብ ለሕዝብ ኮንፍረንሶችን በአፋጣኝ ለማካሄድም ርዕሰ መስተዳደሮቹ ወስነዋል።

ምንጭ: EBC

Advertisement

1 Comment

Comments are closed.