NEWS: Ethiopian To Start Flights To Asmara Next Week | በሚቀጥለው ሳምንት ወደ አሥመራ በረራ ሊጀመር ነው

የኢትዮጵያ አየር መንገድ ለሃያ ዓመታት ተቋርጦ የነበረውን የአሥመራ በረራውን ማክሰኞ ሐምሌ 17/2010 ዓ.ም ሊጀምር መሆኑን አሳወቀ።

ጠቅላይ ሚኒስትር ዐብይ አህመድ በኤርትራ ያደረጉትን ይፋዊ ጉብኝት ተከትሎ የሁለቱ ሃገራት መሪዎች ከደረሱት ስምምነቶች መካከል አንዱ የሆነው የአየር ግንኙነትን የመጀመር ውሳኔን ተከትሎ ነው ይህ ይፋ የሆነው።

የኢትዮጵያ አየር መንገድ እንዳሳወቀው ከሁለት አስርት ዓመታት በኋላ ለሚያደርገው ለዚህ በረራ በአሁኑ ወቅት ተጠቃሽ ከሆኑት ዘመናዊ አውሮፕላኖቹ መካከል አንዱ የሆነው ቦይን 787 እንደሚያበር አሳውቋል።

• የጠቅላይ ሚኒስትር ዐብይ አህመድ አዲስ ምዕራፍ

አውሮፕላኑ ከ250 መንገደኞች በላይ የሚያሳፍር ሲሆን አየር መንገዱ በቀዳሚነት ሁለት በረራዎችን ለማክሰኞና ለረቡዕ አዘጋጅቷል።

ከኢትዮጵያ አየር መንገድ ባገኘነው መረጃ ለጉዞው የሚያስፈልጉ ዝርዝር ጉዳዮች በተከታይነት ይፋ እንደሚሆኑ ተገልጿል። በተጨማሪም ወደ ኤርትራ ለመሄድ የሚፈልጉ ተጓዦች ቪዛ እንደሚያስፈልጋቸው ያገኘነው መረጃ አመልክቷል።

ነገር ግን የኤርትራ ኤምባሲ ኢትዮጵያ ውስጥ ሥራዉን ስላልጀመረ ኢትዮጵያዊያን ቪዛው አሥመራ እንደደረሱ ማግኘት እንደሚችሉ እየተነገረ ነው።

ነገር ግን ለጉዞው የሚያስፈልጉ ዝርዝር መረጃዎች ከሁለቱም ወገን እስካሁን ይፋ አልሁነም።

ምንጭ: ቢቢሲ

Advertisement

1 Comment

Comments are closed.