NEWS: ጠቅላይ ሚኒስትር ዶ/ር አብይ ከአፋር ክልል ነዋሪዎች ጋር በሰመራ እየተወያዩ ነው

በአልአዛር ታደለ

የኢፌዴሪ ጠቅላይ ሚኒስትር ዶክተር አብይ አህመድ አፋር ክልል ሰመራ ከተማ ናቸው።

ጠቅላይ ሚኒስትር ዶክተር አብይ በአሁኑ ወቅትም ከአፋር ክልል ከተውጣጡ የህብረተሰብ ተወካዮች ጋር ተገናኝተው በመልካም አስተዳደር እና በሌሎች ጉዳዮች ዙሪያ በመወያየት ላይ ይገኛሉ።

በውይይቱ መጀመሪያ ላይ ጠቅላይ ሚኒስትር ዶክተር አብይ የአፋር ህዝብ በቀይ ባህር አካባቢ ባለው ስትራቴጂያዊ ቦታ ምክንያት ለዘመናት ወራሪ ሀይሎችን በጀግንነት እየመከተ የሀገሩን ሉዓላዊነት እንዳስጠበቀ አንስተዋል።

በቀጣይም ውበታችንም ጥንካሬያችንም የሚመጣው ከኢትዮጵያ አንድነት በመሆኑ ሁሉም አንድ ጠንካራ ሀገር ለመገንባት ያላሰለሰ ጥረት እንዲያደርግ ነው ያሳሰቡት።

ክልሉ የሰው ዘር መገኛ በመሆኑና በተፈጥሮ የታደላቸው ትልልቅ ሀብቶች በመኖራቸው ይህንን መስህብ የቱሪስት መዳረሻ ለማድረግ መንግስት እንደሚሰራ ገልፀዋል።

እንደ ፖታሽ ያሉ የተፈጥሮ ማዕድናትን ጥቅም ላይ ማዋልም ይገባል ብለዋል።

በክልሉ ባለው የቀንድ እና የጋማ ከብት ሀብት በቁጥር ከመመካት ባለፈ በህዝቡ ህይወት ላይ ለውጥ እንዲያመጣ የፌደራል መንግስት ከክልሉ ጋር በቅንጅት እንደሚሰራም አረጋግጠዋል።

በአሁኑ ወቅት ለጠቅላይ ሚኒስትሩ የተለያዩ ጥያቄዎች ቀርበው ምላሽ እየተሰጠባቸው ይገኛል።

ምንጭ: ኤፍ ቢ ሲ(FBC)

 

Advertisement

1 Comment

Comments are closed.