U.S. President Trump: “USA Is Not a Refugee Camp” – “አሜሪካ የስደተኞች ካምፕ እንደትሆን አልፈቅድም”

የአሜሪካው ፕሬዚዳንት ዶናልድ ትራምፕ ሃገራቸው “የስደተኞች ካምፕ” እንድትሆን እንደማይፈቅዱ ተናግረዋል። ከሰሞኑ በስደተኞች ላይ የተከፈተው ዘመቻን እንደሚገፉበትም ነው ፍንጭ የሰጡት።

በዋይት ኃውስ በተሰናዳ ዝግጅት ላይ ድምፃቸውን ያሰሙት ትራምፕ “ዩናይትድ ስቴትስ የስደተኞች ካምፕ እንድትሆን አልፈቅድም፤ የስደኞች ማጎሪያ ልትሆን አትችልም፤ በፍፁም!” ሲሉ ተናግረዋል።

ያለፈው ሳምንት ማብቂያ ላይ መገናኛ ብዙሃንን ሞልተውት የነበሩ ሕፃናት ከወላጆቻቸው ሲለዩ የሚያሳዩ ፎቶዎች ቁጣን ቀስቅሰዋል።

የተባበሩት መንግሥታት የሰብዓዊ መብት ኃላፊ ፖሊሲውን “ሰብዓዊነት የጎደለው” ሲሉ ኮንነውታል።

ትራምፕ ዕለተ ሰኞ ሁኔታውን በአመክንዮ ለማስረዳት ሲሞክሩ “አውሮፓና ሌሎች ቦታዎች እየሆነ ያለውን ተመልከቱ፤ መሰል ድረጊቶች አሜሪካ ውስጥ እንዲፈጠሩ ዕድል አልሰጥም” ብለዋል።

ከዚህ በፊትም “የአውሮፓ ሃገራት ሚሊዮን ስደተኞችን ወደሃገራቸው ማስገባታቸው ስህተት ነበር” ሲሉ ተደምጠው ነበር።

ሪፐብሊካኑ ፕሬዚዳንት ዶናልድ ትራምፕ ዴሞክራቶች በስደተኞች ጉዳይ እንዲመክር ወደተሳናዳው ዝግጅት አለመምጣታቸው ያስወቅሳቸዋልም ብለዋል።

"አሜሪካ የስደተኞች ካምፕ እንደትሆን አልፈቅድም"Image copyrightREUTERS

“ትዕግስት አልባው” እየተባለ እየተጠራ ባለው ፖሊሲ አማካይነት እስካሁን 2 ሺህ ያህል ሕፃናት ከቤተሰቦቻቸው ሊለዩ ግድ እንደሆነባቸው መረጃዎች ያሳያሉ።

አብዛኛዎቹ ሕፃናት በማቆያ ሥፍራዎች ያለአሳዳጊዎቻቸው እንደሚገኙም ነው እየተነገረ ያለው።

ህጋዊ ባልሆነ መንገድ ወደ አሜሪካ የገቡ ሰዎችም በወንጀል እንደሚከሰሱ ፖሊሲው ያትታል።

ከዴሞክራቶች ባለፈ የፕሬዚዳንቱ ፓርቲ አባላትም ፖሊሲውን በፅኑ እየተቃወሙት ሲሆን የሃገሪቱ ቀዳማዊ እመቤት ሜላኒያ ትራምፕም “ሕፃናት ከወላጆቻቸው ሊለዩ አይገባም” ሲሉ ክስተቱን ኮንነውታል።

ዴሞክራቷ ሂላሪ ክሊንተንና የቀድሞዋ ቀዳማዊት እመቤት ላውራ ቡሽም ፖሊሲው ሞራል የጎደለው ሲሉ ገስፀውታል።

የማሳሹሴትስ ገዥ የሆኑት ሪፐብሊካኑ ቻርሊ ቤከር “ለዚህ ኢ-ሰብዓዊ ፖሊሲ ወታደሮቼን አልገብርም” ሲሉ ተቃውሞዋቸውን በተግባር አሳይተዋል።

ምንጭ: ቢቢሲ

Advertisement

1 Comment

Comments are closed.