PM Dr. Abiy: What Is Terror? – “ሽብር ምንድን ነው ፣ አሸባሪ ማን ነው?” ጠቅላይ ሚኒስትር አብይ አህመድ

ዛሬ ለህዝብ ተወካዮች ምክር ቤት በወቅታዊ ጉዳዮች ላይ ማብራሪያ የሰጡት ጠቅላይ ሚኒስትር አብይ አህመድ ከምክር ቤቱ አባላት የተለያዩ ጥያቄዎች ተነስተውላቸው ነበር።

ከእነዚህ መካከል የአገሪቱን የሽብር ህግ የሚፃረሩ እርምጃዎች እየተወሰዱ ስለመሆኑ የተነሳው ጥያቄ አንዱ ነበር።

ይህን ጥያቄ ሲመልሱ ሽብር ምንድን ነው ፣አሸባሪስ ማን ነው? የሚል ጥያቄ ያነሱት ጠቅላይ ሚኒስትሩ ነገሩን ሰፋ አድርጎ መመልከት እንደሚያስፈልግ ገልፀዋል።

“ሽብር ሲባል ስልጣን ላይ ለመቆየት፣ ስልጣን ለመያዝም አላግባብ ሃይል መጠቀምንም ይጨምራል” ብለዋል።

ህገ-መንግስቱ የመከላከያና ደህንነት ተቋማት ከፓርቲ ገለልተኛ እንዲሆኑ ቢያስገድድም መሬት ላይ ያለው እውነታ ግን ሌላ መሆኑን ተናግረዋል።ይህ ማለት ደግሞ መንግስት ህጋዊ ባልሆነ መንገድ ተቋማትን ፈጥሯል ማለት እንደሆነ አመላክተዋል።

“ህገመንግስቱ በፍርድ ቤት የታሰረ ሰውን ጨለማ ቤት አስቀምጡ፣ ግረፉ ይላል እንዴ?አይልም። መግረፍ ጨለማ ቤት ማስቀመጥና አካል ማጉደል የኛ የአሸባሪነት ተግባር ነው” በማለት ጣታቸውን መንግስት ላይ ቀስረዋል።

“በሌብነት፣ በመግደልና በመግረፍ የኢትዮጵያ ህዝብ እኛን እስር ቤት ለማስገባት ምክንያት ነበረው” ያሉት ጠቅላይ ሚኒስትሩ ህዝቡ በይቅርታ ለመንግስት ሁለተኛ እድል ሰጥቷልም ብለዋል።

የመንግስት የአልጀርሱን ስምምነት ተግባራዊ የማድረግ እንዲሁም የልማት ድርጅቶችን የተወሰነ ድርሻ ወደ ግል ይዞታ የማዘዋወር ውሳኔዎች የማብራሪያው ዋነኛ ትኩረት ነበሩ።

በሌላ በኩል በአገሪቱ የተለያዩ አካባቢዎች እየታዩ ያሉ ግጭቶችና የባለስልጣናት ሙስናም የንግግራቸው አብየት ጉዳዮች ነበሩ።

አገሪቱ የገጠማትን የውጭ ምንዛሬ እጥረት ለመፍታት ዋነኛው መፍትሄ ኤክስፖርትን ማበረታታት ቢሆንም ሌሎች የኢኮኖሚ ማሻሻያዎችም የሚደረጉ ሲሆን ፕራይቬታይዜሽን አንዱ መሆኑን ገልፀዋል።

በዚህ መሰረት በግል እንዲያዙ የተወሰኑት ኩባንያዎች የገበያ ውድድር ሳይኖርባቸው እንኳ ማደግ ያልቻሉ መሆናቸው ከግንዛቤ ሊገባ እንደሚገባ አስረድተዋል።

የአልጀርሱ ስምምነት ተግባራዊነትን በተመለከተ የድንበር ኮሚሽኑን ውሳኔ ያፀደቀው ምክር ቤቱ የራሱን የወቅቱ ቃለ ጉባኤ ተመልሶ ይፈትሽ ብለዋል ጠቅላይ ሚኒስትሩ።

“የድንበር ኮሚሽኑን ውሳኔ የፌደራል ካቢኔ አፅድቆት በወቅቱ የነበሩት ክቡር ጠቅላይ ሚኒስትር መለስ ዜናዊ ለተከበረው ምክር ቤት ሪፖርት አቅርበው በሙሉ ድምፅ አፅድቋል ይህ ምክር ቤት። ተመልሶ ቃለ ጉባኤ መፈተሽ ይችላል።የፌደራል ካቢኔ ተነጋግሮና አፅድቆ ለአፍሪካ ህብረት ጉዳዩን መቀበሉን በደብዳቤ አሳውቋል።እኔ ቢሮ አለ ቃለ ጉባኤው።አዲስ ውሳኔ አዲስ ሃሳብ የለም የሚለውን ይህ ፓርላማ ከማንም በላይ መገንዘብና ማስገንዘብ ይኖርበታል”ብለዋል።

በአሁኑ ወቅት በአገሪቱ የተለያዩ አካባቢዎች እየታዩ ያሉ ብሄርን መሰረት ያደረጉ ግጭቶች ምክንያት ጥላቻ እንደሆነና በግጭቶቹ እጃቸው ያለ ባለስልጣናትም ሆኑ ከስልጣን ውጭ የሆኑ እጃቸውን እንዲሰበስቡ አስጠንቅቀዋል።

በተመሳሳይ ጠቅላይ ሚኒስትሩ ከሙስና ጋር በተያያዘ የመንግስት ባለስልጣናትን ዳግም አስጠንቅቀዋል።

ምንጭ: ቢቢሲ

Advertisement

1 Comment

Comments are closed.