NEWS: US First Lady Melania Trump Disagrees With Her Husbands Policy | ሜላኒያ ትራምፕ የትራምፕን ፖሊሲ ተቃወሙ

የአሜሪካዋ ቀዳማዊ እመቤት ሜላኒያ ትራምፕ በአወዛጋቢው የዶናልድ ትራምፕ የስደተኞች ፖሊሲ ጉዳይ ድምፃቸውን አሰምተዋል።

ትራምፕ ተግባራዊ እንዲሆን ያደረጉት የስደተኞች ፖሊሲ ህጋዊ ባልሆነ መንገድ ወደ አሜሪካ የገቡ ወላጆችና ልጆቻቸውን እየለያየ ነው በሚል ወቀሳ እየደረሰበት ነው።

ቀዳማዊት እመቤት ሜላኒያም ይህንን በማስመልከት ነው “የጉዳዩ አሳስቦኛል” ድምፃቸውን ያሰሙት።

የእመቤቲቱ አፈ-ቀላጤ የሆኑ ሰው “ቀዳማዊ እመቤት ሜላኒያ ህፃናት ከወላጆቻቸው ሲለዩ ማየት አይሹም” ሲሉ ተሰምተዋል።

ፕሬዚዳንት ትራምፕ በስደተኞች ጉዳይ ድርድር ውስጥ አልገባም ሲሉ ያላቸውን አቋም በበርካታ መድረኮች ላይ ማንፀባረቃቸው የሚዘነጋ አይደለም።

ቢሆንም ፖሊሲው ቤተሰብን ከማፍረስ ያለፈ ፋይዳ የለውም በሚል በብዙዎች ዘንድ ትችት እየደረሰበት ይገኛል።

የቀድሞዋ ቀዳማዊት እመቤት ላውራ ቡሽም ፖሊሲውን “ሞራል የጎደለው” ሲሉ ነው የነቀፉት”

የትራምፕን ፖሊሲ ተከትሎ በ6 ሳምንታት ጊዜ ውስጥ 2000 ያህል ቤተሰብ ሊበተን እንደሚችል ነው እየወጡ ያሉ መረጃዎች የሚጠቁሙት።

ወደ አሜሪካ ሊዘልቁ ሲሉ የተያዙ ሰዎች ደግሞ ህጋዊ ባልሆነ መንገድ ድንበር በመሻገር በሚል ለእሥር ሊዳረጉ እንደሚችሉ ፖሊሲው ያትታል።

በመቶዎች የሚቆጠሩ ስደተኞች በአሁኑ ወቅት በማቆያ ሥፍራዎች የሚገኙ ሲሆን የሰብዓዊ መብት ተሟጋቾች ሁኔታውን ኢ-ሰብዓዊ ሲሉ እየወቀሱት ይገኛሉ።

ሜሊኒያ ትራምፕ የባላቸውን ፖሊሲ ተቃወሙImage copyrightGETTY IMAGES

ጉዳዩ እረፍት የነሳቸው እመቤት ትራምፕ ሪፐብሊካንም ሆኑ ዴሞክራቶች በስደተኞች ጉዳይ ሁሉንም ሊያስማማ የሚችል ፖሊሲ ሊቀርፁ እንደሚገባም በመግለጫቸው አስምረዋል።

“ወረቀት ላይ የሰፈረው ብቻ ሳይሆን ህግጋተ-ልቡናም ሊገዛን ይገባል” ሲሉ ነው ሃሳባቸውን ያጠናከሩት።

የወቅቱን ቀዳማዊ እመቤት ፈለግ የተከተሉት ላውራ ቡሽም “ፖሊሲው ጨካኝ፣ ሞራል የጎደለው እና ልብ ሰባሪ ነው” ሲሉ የተሰማቸውን ሃዘን ገልፀዋል።

ፕሬዚዳንት ትራምፕ በትዊተር አፊሴላዊ ገፃቸው ፖሊሲውን የቀረፁት ዴሞክራቶች ናቸው የሚል ማላካክ ያዘለ መልዕክት አስተላልፈዋል።

ተቺዎች ግን ህጉ የረቀቀው በጠቅላይ አቃቤ ህጉ ጄፍ ሴሺንስ ነው፤ በዚያ ላይ የፕሬዚዳንቱ ይሁንታን ካገኘ ከጥቅም ውጭ ለመሆን ጊዜ አይፈጅበትም ሲሉ የመልስ ምት ይሰንዝራሉ።

የፖሊሲው ሰለባ የሆኑ በርካታ ስደተኞች ከሰሜን አሜረካዎቹ ሆንዱራስ እና ኤል ሳልቫዶር የመጡ እንደሆነ ተነግሯል።

ምንጭ: ቢቢሲ

Advertisement

1 Comment

Comments are closed.