NEWS: Pro Saudi Arabia Troops Attack Yemen’s Port | በሳኡዲ አረቢያ የሚታገዙ ኃይሎች የየመን ወደብን አጠቁ

በሳኡዲ አረቢያ መንግሥት የሚታገዙ ኃይሎች የሁቲ አማፅያን የተቀመጠላቸውን ቀነ ገደብ ባለማክበራቸው የሁዳይዳን ወደብ ማጥቃት ጀመሩ።

እንደ አካባቢው መገናኛ ብዙሃን እንደዘገቡት አማፅያኑ የሚገኙበት ስፍራ ከባሕር እና ከአየር የቦንብ ናዳ ወርዶበታል።

የበጎ አድራጎት ድርጅቶች ከተማዋ ላይ ጥቃት የሚፈፀም ከሆነ እስከ ሩብ ሚሊዮን የሚጠጉ ሰዎች ሊጎዱ ይችላሉ፣ ሰብአዊ ቀውስም ይኖራል ሲሉ አስጠንቅቀዋል።

ወደቡ ወደ የመን የሚገቡ ሰብአዊ እርዳታዎች መግቢያ ዋነኛ በር ሆኖ የሚያገለግል ነው።

ጦርነት ከጥቅም ውጭ ባደረጋት የመን ከሰባት ሚሊዮን በላይ ዜጎች ሕይወታቸው የተመሰረተው በምግብ እርዳታ ላይ ነው።

በሳኡዲ መንግሥት የሚያስተዳድረው አልአረቢያ የተባለው የዜና ተቋም እንዳለው የሁዳይዳ “ነፃነት” የምድር ለምድር ውጊያው ፣ በባህርና በአየር ተደግፎ መጀመሩን ዘግቧል።

ፍንዳታዎችም በወደብ ከተማዋ ዳርቻዎች መሰማቱን አስፍሯል።

የየመን ፕሬዝዳንት የሆኑት አብዱራቡህ መንሱር ሃዲ በሰጡት መግለጫ እንዳሉት አማፅያኑ ከተማዋን ለቅቀው እንዲወጡ ያለውን ፖለቲካዊ መፍትሄ ሁሉ አሟጠው መጠቀማቸውን ገልፀዋል።

በሳኡዲ የሚመራው ጥምረት አባል የሆነችው የተባበሩት አረብ ኤሚሬትስ ቀደም ብላ ለሁቲዎች ስፍራውን ለቅቀው እንዲወጡ አልያም ጥቃት እንደሚጠብቃቸው አስጠንቅቃ ነበር።

የተባበሩት አረብ ኤሚሬትስ የውጭ ጉዳይ ሚኒስትር ዴኤታ የሆኑት አንዋር ጋረጋሽ ለቢቢሲ እንደተናገሩት ጥምረቱ ካደረገው ዲፕሎማሲያዊ ጥረቶች በኋላ የተቀመጠውን የ48 ሰዓት ገደብ ማክበር ባለመቻላቸው ትዕግስቱን መጨረሱን ተናግረዋል።

ጥምረቱ ወደቡን የተባበሩት መንግሥታት እንዲቆጣጠረው ቢፈልግም ሁቲዎች ለቀው ባለመሄዳቸው ወታደራዊ እርምጃ መውሰድ መጀመራቸውን ተናግረዋል።

ባለፉት ሦስት ዓመታት በየመን የእርስ በእርስ ጦርነት 10 ሺህ ሰዎች መገደላቸውንና በዓለም ታይቶ በማይታወቅ መልኩ ሰብአዊ ቀውስ መድረሱን የተባበሩት መንግሥታት ድርጅት ገልጿል።

ምንጭ: ቢቢሲ

Advertisement

1 Comment

Comments are closed.