የሕዝብ እንደራሴዎች ምክር ቤት የኦሮሚያ ክልል በአዲስ አበባ ላይ ያለውን ልዩ ጥቅም ለመወሰን የወጣው አዋጅ ላይ ዛሬ ጠርቶት የነበረው የሕዝብ ውይይት ተሰረዘ::

                                                                     

(ትዕግስት ዘሪሁን)

የሕዝብ እንደራሴዎች ምክር ቤት የኦሮሚያ ክልል በአዲስ አበባ ላይ ያለውን ልዩ ጥቅም ለመወሰን የወጣው አዋጅ ላይ ዛሬ ጠርቶት የነበረው የሕዝብ ውይይት ተሰረዘ…

በስብሰባ አዳራሹ በርከት ያለ ሕዝብ ቢገኝም ተሰብሳቢዎቹ የሀገሪቱ ወቅታዊ ሁኔታ አሳሳቢ በሆነበት በዚህ ወቅት ስለአዋጁ አንወያይም በማለታቸው ውይይቱ ሳይካሄድ ቀርቷል፡፡

አዋጁ ከፌደሬሽን ወደ ሕዝብ ተወካዮች ምክር ቤት ሲላክ የኦሮሚያ ክልል እና የአዲስ አበባ ከተማ ሕዝብ ውይይት እንደሚያደርግበት በመገናኛ ብዙሃን ተነግሮ ነበር፡፡ ይህ በተግባር አልሆነም ያሉት ተወያዮቹ ሰፊው ሕዝብ ሳይወያይበት በፓርላማው አዳራሽ ብቻ ለተገኘ ሕዝብ ቀርቦ ውይይት ተደርጎበታል ማለት አይቻልም ብለዋል፡፡

አሁን ባለው ወቅታዊ ሁኔታ፣ በግጭቱ ምክንያት ከ6 ሺ በላይ ሕዝብ በመጠለያ ውስጥ ይኖራል ያሉት ተወያዮቹ፤ ለዓመታት የቆየው ይህ አዋጅ ለወራት ቢራዘም ምን ችግር አለው ለምንስ አስቸኳይ ሆነ ሲሉ ጠይቀዋል፡፡

ውይይቱ ይካሄድ አይካሄድ በሚለው ላይ ውሳኔ ላይ ሳይደረስ ከረፋዱ 4፡17 ላይ ለሻይ እረፍት ወጥተዋል፡፡

ከ15 ደቂቃ የሻይ እረፍት በኋላ የተመለሱትን ተወያዮች በውይይቱ ላይ የተገኙት የፓርላማው አባል አቶ አባዱላ ገመዳ ከመቀመጫቸው ተነስተው ፊታቸውን ወደ እነሱ በማዞር ዘለግ ላለ ጊዜ አነጋግረዋቸዋል፡፡ ውይይቱ እንዲቀጥልም ሊያግባቧቸው ሞክረዋል፡፡

ይሁንና ተወያዮቹ ሌላ አንገብጋቢ ችግር እያለ እና ሕዝቡ ሳይወያይበት በፓርላማ ህዝባዊ ውይይት ሊደረግ አይገባም በሚል ሀሳባቸው ፀንተው 4፡50 ላይ ስብሰባው ተበትኗል፡፡
ተለዋጭ ቀጠሮም አልተያዘም፡፡

ምንጭ:- የሸገር FM 102.1 ሬዲዮ

Advertisement