NEWS: የአሜሪካ ሴኔት አዲስ የታክስ ማሻሻያ አዋጅ አፀደቀ – Trump’s tax bill: US Senate Passes Reform Legislation

                                                            

የአሜሪካ ሴኔት ከ30 ዓመት ወዲህ ትልቁ ነው የተባለለትን አዲስ የታክስ ማሻሻያ አዋጅ አፅድቋል።

ሴኔቱ ማሻሻያውን በዛሬው እለት ያፀደቀው ሲሆን፥ በሁለቱም ምክር ቤቶች ውስጥ ሪፐብሊካን አብላጫውን ድምፅ ይዘው እንደነበረ ተነግሯል።

የታክስ ማሻሻያ ላይ የተደረገውን የድምፅ አሰጣጥ የመሩት የአሜሪካው ምክትል ፕሬዚዳንት ማይክ ፔንስ ውጤቱንም ይፋ አድርገዋል።

በዚህም የታክስ ማሻሻያ አዋጁ 51 ለ48 በሆነ ድምፅ መፅደቁን አስታውቀዋል።

የአሜሪካ የህዝብ ተወካዮች ምክር ቤት አፈ ጉባዔ ፓል ሪያን፥ “ዛሬ ለሀገሪቱ ህዝቦች ገንዘባቸውን መልሰን እየሰጠናቸው ነው፤ ከዚህ በኋላ ይህ ገንዘብ የእነሱ ነው” ብለዋል።

የታክስ ማሻሻያው የሚጠበቅበትን የህግ ሂደቶችን ለማጠናቀቅ ቀደም ሲል ወዳፀደቀው የህዝብ ተወካዮች ምክር ቤት ተመልሶ ይላካልም ተብሏል።

ማሻሻያው የሚጠበቅበትን የህግ ሂደቶችን አጠናቆ ከጨረሰም ለፕሬዚዳንት ዶናልድ ትራም አስተዳደር ትልቅ ስኬት ነው ተብሏል።

የታክስ ማሻሻያ ህጉ የአገሪቱን የኮርፖሬት ታክስ መጠን ከ35 በመቶ ወደ 21 በመቶ ዝቅ የሚያደርግ ነው።

እንዲሁም ዜጎች ከገቢያቸው ከታክስ ነፃ የሚሆንላቸው መጠን ላላገቡ ሰዎች ከ6 ሺህ 350 የአሜሪካ ዶላር ወደ 12 ሺህ የአሜሪካ ዶላር ከፍ ሲል፥ ላገቡ ደግሞ ከ12 ሺህ 700 ዶላር ወደ 24 ሺህ የአሜሪካ ዶላር ከፍ ብሏል።

የታክስ ማሻሻያው ባለፀጋዎችን የሚጠቅም ነው በሚል የተለያዩ ትችቶች እየቀረቡበት ይገኛሉ።

ሪፐብሊካን ግን በታክስ ማሻሻያው ለኮርፖሬሽኖች፣ ለጥቃቅን የንግድ አንቀሳቃሾች እና ግለሰቦች የተደረገው የታክስ ቅነሳ የሀገሪቱን የኢኮኖሚ እድገት የሚጨምር ነው ብለዋል።

ምንጭ: ቢቢሲ

Advertisement