NEWS: ሳዑዲ መራሹ ጦር በ11 ቀናት በየመን በፈፀመው የአየር ጥቃት 136 ንፁሃን ዜጎች ተገድለዋል – 136 Civilians Killed in Saudi-led Attacks in 11 Days

                                                               

በሳዑዲ አረቢያ የሚመራው ጦር ባለንበት ወር 11 ቀናት ውሰጥ በየመን በፈፀማቸው የአየር ድብደባዎች በትንሹ የ136 ንጹሃን ዜጎች ሀይወት ማለፉን የተባበሩት መንግስታት ድርጅት አስታወቀ።

የተባበሩት መንግስታት የሰብዓዊ መብት ኮሚሽነር ቃል አቀባይ ሩፐርት ኮልቪል፥ በሳዑዲ አረቢያ የሚመራው ጦር የቀድሞ የየመን ፕሬዚዳንት አብደላህ ሳሌህ መገደላቸውን ተከትሎ እየወሰደ ያለው እርምጃ እና በንፁሃን ዜጎች ላይ እየደረሰ ያለው ጉዳት አሳሳቢ መሆኑን ተናግረዋል።

የቀድሞ ፕሬዚዳንት አብደላህ ሳሌህ በሀውቲ አማፅያን የተገደሉ ሲሆን፥ ይህም ከሀውቲ ጋር የደረሱትን የትብብር ስመምነት ወደ ጎን በመተው ከሳዑዲ ጋር ለመደራደር ዘግጁ ነኝ በማለታቸው ነው የተገደሉት።

ቃል አቀባዩ በጄኔቫ በሰጡት መግለጫ፥ ከጦርነቱ ጋር ምንም ግንኙነት የሌላቸው 136 ንጹሃን የመናውያን መሞታቸውን እና 87 ሰዎች ላይ ደግሞ የተለያየ መጠን ያለው ጉዳት መድረሱን አስታውቀዋል።

ከህዳር 27 እስከ ታህሳስ 7 በሳዑዱ በሚመራው ጦር የተፈፀመው የአየር ድብደባ በሃውቲ አማፅያን የሚመራውን ቴሌቪዥን ጣቢያን ጨምሮ በሆስፒታል፣ በማረሚያ ቤት፣ በሰርግ ድግስ እና ሌሎች ተቋማት ላይ ጉዳት አድርሷል።

በጥቃቱ ህይወታቸውን ካጡት ውስጥ በርካታ ህፃናት እንደሚገኙም ታውቋል።

ባለፈው ታህሳስ 4 በየመን ሰነዓ በሚገኝ ማረሚያ ቤት ላይ በተፈፀመ ጥቃትም የ45 እስረኞች ህይወት ማለፉ ይታወሳል።

ታህሳስ 1 ቀን በሆስፒታል ላይ በተፈፀመው ጥቃትም የሰባት ንጹሃን ዜጎች ህይወት ማለፉ እና በሰርግ ድግስ ወደ ቤታቸው በመመለስ ላይ ከነበሩ ሰዎች ውስጥም ዘጠኝ ህጻናት እና አንድ ሴት ህይወታቸው አልፏል።

ባሳለፍነው አርብ እለት በአንድ የእርሻ ስፍራ ላት በተፈፀመ የአየር ድብደባም የ20 ሰዎች ሀይወት ያለፈ ሲሆን፥ ከእነዚህ ውስጥ 14 ህፃናት ይገኙበታል።

በየመን እየተካሄደ ያለው ጦርነት አሁን ላይ 1 ሺህ ቀናትን አስቆጥሯል።

በጦርነቱ ምክንያት ከ10 ሺህ በላይ ንጹሃን ዜጎች ህይወታቸውን ያጡ ሲሆን፥ 8 ነጥብ 4 ሚሊየን የመናውያን ደግሞ ለረሃብ አደጋ መጋለጣቸውን ነው የተባበሩት መንግስታት ድርጅት ያስታወቀው።

ምንጭ:- ኤፍ ቢ ሲ(FBC)

Advertisement