NEWS: ሳይሪል ራማፖሳ የደቡብ አፍሪካው ገዢ ፓርቲ ፕሬዝዳንት ሆነው ተመረጡ – South Africa’s ANC Picks Cyril Ramaphosa as Leader

                              

የደቡብ አፍሪካ ምክትል ፕሬዝዳንት የሆኑት ሳይሪል ራማፖሳ የሀገሪቱ ገዢ ፓርቲ (አፍሪካ ብሄራዊ ኮንግረስ) ፕሬዝዳንት በመሆን ተመርጠዋል፡፡

በምርጫው ከቀድሞዋ የአፍሪካ ህብረት ኮሚሽን ሊቀመንበር ኒኮሳዛና ድላሚኒ ዙማ ብርቱ ፉክክር ቢገጥማቸውም ምርጫውን በማሸነፍ የወቅቱ ፕሬዝዳንት ጃኮብ ዙማን በመተካት ቀጣዩ የደቡብ አፍሪካ ፕሬዝዳንት የመሆን እድላቸውን አስፍተዋል፡፡

በተሰጠው ድምፅ መሰረት ራማፖሳ 2440 ሲያገኙ ድላሚኒ ዙማ 2261 የሆነ ድምፅ አግኘተዋል፡፡

የፓርቲው የካቢኔ ሚኒስትር የነበሩት የ68 አመቷ ድላሚኒ ዙማ በምርጫው ቢቀናቸው የመጀመሪያዋ ሴት የአፍሪካ ብሄራዊ ኮንግረስ እንዲሁም የሀገሪቱ ፕሬዝዳንት የመሆን እድል ነበራቸው፡፡

የፖለቲካ ተሳትፏቸውን ከሰራተኛ ህብረት የጀመሩት ራማፖሳ እኤአ ከ2014 ጀምሮ በምክትል ፕሬዝዳንትነት እያገለገሉ ይገኛሉ፡፡

የ65 አመቱ ሳይሪል ራማፖሳ እኤአ 1997 በተካሄደው የአፍሪካ ብሄራዊ ኮንግረስ ፓርቲ ፕሬዝዳንታዊ ምርጫም ተወዳድረው በቀድሞው ፕሬዝዳንት ታቡም እምቤኪ ተሸንፈዋል፡፡

ዘንድሮ ባደረጉት ፕሬዝዳንታዊ የምርጫ ፉክክር ግን ከሀገሪቱ ትልቁ የሰራተኞች ህብረት እና ከብሄራዊ የማዕድል ሰራተኞች ህብረት ከፍተኛ ድጋፍ ማግኘታቸው ተዘግቧል፡፡

አዲሱ የአፍሪካ ኮንግረስ ፓርቲ ፕሬዝዳንት ራማፖሳ ደቡብ አፍሪካ እኤአ 2019 በምታካሂደው ብሄራዊ ምርጫ ካሸነፉ 5ኛው የሀገሪቱ ፕሬዝዳንት ይሆናሉ፡፡
ምንጭ፡ሮይተርስ

Advertisement