NEWS: በግብፅ ሲናይ በመስጊድ ላይ በተፈፀመ ጥቃት የ85 ሰዎች ህይወት አለፈ – Egypt Sinai: Bomb and Gun Attack on Mosque ‘kills 85’

                                                     

በግብፅ ሲናይ ታጣቂዎች በመስጊድ ላይ የቦምብ እና የጦር መሳሪያ ተኩስ ጥቃት ማድረሳቸው ተነግሯል።

የሀገሪቱ የዜና አገልግሎት ድርጅት እንዳስታወቀው፥ በሰሜናዊ የሲናይ ግዛት በተፈፀመው ጥቃት የ85 ሰዎች ህይወት አልፏል።

የአይን እማኞች ለግብፅ መገናኛ ብዙሃን እንደተናገሩት፥ ጥቃቱ በቢር አል አቤድ ከተማ የዓርብ የአምልኮ ፕሮግራም ወቅት ነው የተፈፀመው። 

የአካባቢው ፖሎሶችም፥ በአራት ተሽከርካሪ የመጡ ታጣቂዎች ዋናው መንገድ ለቀው ወደ መስጊዱ በመግባት የአርብ የፀሎት ስነ ስርዓት ላይ በነበሩ ሰዎች ላይ ጥቃት መፈፀማቸውን ተናግረዋል።

                                                         

በጥቃቱም ህይወታቸውን ካጡት በተጨማሪ 80 ሰዎች ላይም የተለያየ መጠን ያለው የመቁሰል አደጋ መድረሱን ነው ፖሊስ ያስታወቀው።

ፕሬዚዳንት አብዱልፈታህ አልሲሲ በጥቃቱ ዙሪያ ከሀገሪቱ የፀጥታ አካላት አመራሮች ጋር ተገናኝተው ሊወያዩ መሆኑን ተነግሯል።

ከዛሬው ጥቃት ቀደም ብሎ ከሳምንታት በፊትም ታጣቂዎች በግብፅ ወታደሮች ላይ ጥቃት ፈፅመው በርካታ የሀገሪቱ የጦር አባላት ህይወት ማለፉ ይታወሳል።

ከዛሬው ጥቃት ጀርባ የትኛው አካል እንዳለ እስካሁን በግልፅ የተዋቀ ነገርም የለም።

ግብፅ በሲናይ ክልል ውስጥ የሚንቀሳቀሰውን እስላማዊ ቡድን እንደ አውሮፓውያኑ አቆጣጠር ከ2013 ጀምሮ በመዋጋት ላይ ትገኛለች።

እስላማዊ ቡድኑ የግብፅ ፕሬዚዳንት የነበሩት መሃመድ ሙርሲ እንደ አውሮፓውያኑ አቆጣጠር በሀምሌ ወር 2013 ከስልጣን መውረዳቸውን በሀገሪቱ የተለያዩ ጥቃቶችን እያደረሰ ይገኛል።

ከዚያን ጊዜ አንስቶም በመቶዎች የሚቆጠሩ ፖሊሶች፣ ወታደሮች እና ንፁሃን ዜጎች ህይወት ማለፉም ይታወሳል።

ምንጭ: ቢቢሲ

Advertisement