NEWS: ትዊተር ሁለት የሩሲያ የዜና አውታሮች ማስታወቂያ ላይ ክልከላ ጣለ – Twitter Bans Ads From Two Russian Media Outlets Over Election Interference

                                                          

ትዊተር ከ2016 የአሜሪካ ፕሬዚዳንታዊ ምርጫ ጣልቃ ገብነት ጋር በተያያዘ የሩሲያ ቱዴይ እና የስፑትኒክ የዜና አውታሮችን ማስታወቂያዎች አገደ።

የማህበራዊ ተስስር ገፅ ኩባንያው በዓለም ታዋቂ ለሆኑት ሁለቱ ግዙፍ መገናኛ ብዙሃን የማስታወቂያ ቦታ ላለመሸጥ ክልክላ የጣለው በአሜሪካው ምርጫ ወቅት ጣልቃ ገብነት ፈጥረው ሊሆን እንደሚችሉ ባደረበት ስጋት ነው።

በዚህም መሰረት ከሩሲያ ቱዴይ(አርቲ) እና ስፑትኒክ የሚመጡ ማስታወቂያዎችን እና ግንኙነት ያላቸውን የትዊተር መጠቀሚያ አድራሻዎች መዝጋቱን ገልጿል።

አሜሪካ ሁለቱን የሩሲያ መገናኛ ብዙሃን የክሬምሊን መልዕክትን ለማስተላለፍ የተወከሉ በሚል ተችታለች።

ትዊተር መገናኛ ብዙሃኑ በማህበራዊ ሁኔታዎች እና በምርጫው ላይ ያላቸውን ጣልቃ ገብነት ለመመርመር በሚደረገው ጥረት ከአርቲ እና ከስፑትኒክ ከሰበሰበው ገቢ ውስጥ 1 ነጥብ 9 ሚሊየን የአሜሪካ ዶላር ድጋፍ እንደሚያደርግ ነው የጠቀሰው።

በ2016 የአሜሪካ ምርጫ ጣልቃ ገብነት ዙሪያ ባደረገው ጥልቅ ፍተሻ ተመስርቶ ውሳኔ ላይ መድረሱን ተናግሯል።

ከዚህም ባሻገር የአሜሪካ የምርመራ ቡድን አር ቲ እና ስፑትኒክ የሩሲያ መንግስት አንድ አካል ሆነው በፕሬዚዳንታዊ ምርጫ ጣልቃ ለመግባት ሞክረዋል የሚል ሪፖርት ማቅረባቸውን ተከትሎ ነው ኩባንያው ምርመራ አድርጎ ያገዳቸው።

ሆኖም የሩሲያ ባለስልጣናት ትዊተር በአሜሪካ የመርማሪዎች ቡድን ግፊት ያልተገባ እርምጃ እየወሰደ ነው በሚል ትችት አቅርበውበታል።

የሀገሪቱ የውጭ ጉዳይ ሚኒስቴር ትዊተር የወሰደው እርምጃ በአሜሪካ የሚገኙ የሩሲያ መገናኛ ብዙሃንን ለመዝጋት የታቀደበት ሌላ ችግር ፈጣሪ ሂደት ነው ብሎታል።
በምላሹም ሞስኮ ተመጣጣኝ እርምጃ ልትወስድ እንደምትችል ነው ያስነጠቀቀው።

የአር ቲ ምክትል ዋና አዘጋጅ ኪሪል ካርኖቪች ቫውላ በበኩላቸው፥ “ጣቢያችን ምንም ዓይነት ህገወጥ ስራ አልሰራም፤ በአሜሪካ ምርጫ ጣልቃ እንዲገባ ያስገደደው አካልም የለም፤ ጣልቃ ገብቶ አያውቅም” ብለዋል።

ትዊተር በሩሲያ ገንዘብ ድጋፍ የሚሰሩ ማስታወቂያዎችን በገፁ እያስተላለፈ ነው በሚል በመተቸቱ በራሱ ቁጥጥር ለማድረግ እና ሩሲያዊ ይዘት ያላቸውን ማስታወቂያዎች ለማገድ ፈቃደኛ ሆኖ እየሰራ ነው።

ሩሲያ ከአሜሪካ የምርጫ ጣልቃ ገብነት ገር በተያያዘ የቀረቡባትን ውንጀላዎች በተደጋጋሚ ጊዜ አጣጥላለች።

ምንጭ:- ኤፍ ቢ ሲ(FBC)

Advertisement