NEWS: የኬንያውያን በድጋሚ ፕሬዚዳንታቸውን እየመረጡ ነው – kenya Elections

                                                               

ኬንያውያን በሀገሪቱ ፍርድ ቤት ውሳኔ መሰረት በዛሬው ዕለት በድጋሚ እየተካሄደ ባለው ፕሬዚዳንታዊ ምርጫ ድምፅ መስጠጥ ጀምረዋል።

የኬንያ ፕሬዚዳንት ኡሁሩ ኬንያታ ምርጫውን በማስመልከት በትናንትናው እለት ባስተላለፉት መልእክት ፥ የሀገሪቱ ህዝቦች ድምጽ እንዲሰጡ እና ሰላማዊ ሆነው እንዲቆዩ ጠይቀዋል።

“የአፍሪካውያን መብት እንዲጠበቅ አባቶቻችን ተዋግተው ህይወታቸው መስዋእት አድርገዋል” ያሉት ፕሬዚዳንቱ፥ “እኛም ይህንን ውርስ አክብረን መጓዝ አለብን” ሲሉም ተናግረዋል።

የተቃዋሚ ፓርቲ መሪው ራይላ ኦዲንጋ በበኩላቸው ደጋፊዎቻቸው ወደ ምርጫ ጣቢያዎች በመሄድ ድምጽ እንዳይሰጡ ጥሪ እያስተላለፉ ነው። 
ደጋፊዎቻቸው ሰላማዊ ሰልፍ እንዲያደርጉ ጥሪ ማቅረባቸው ተነግሯል።

በዛሬው ዕለትም ከጠዋቱ 12 ሰዓት ላይ የምርጫ ጣቢያዎች በራቸውን ከፍተው መራጮችን ማስተናገድ የጀመሩ ሲሆን፥ የተቃዋሚ ደጋፊዎች ግን በአንዳንድ የኬንያ ክፍል ውስጥ ሰልፍ በመውጣት ወደ ምርጫ ጣቢያዎች የሚወስዱ መንገዶችን የመዝጋት ሙከራ ማድረጋቸው ነው የተገለፀው።

በአሁኑ ጊዜም በአስርሺዎች የሚቆጠሩ ፖሊሶች እና ሌሎች የደህንነት ሰራተኞች የመራጮችን እና የምርጫ ጣቢያን ደህንነት ለመጠበቅ ምርጫው ከመጀመሩ አስቀድመው በምርጫ ጣቢያዎች ተገኝተው ስራቸው እያከናወኑ መሆናቸውም ተነግሯል።

የኬንያ እንደ አውሮፓውያኑ አቆጣጣር በነሃሴ ወር 2017 ፕሬዚዳንታዊ ምርጫ ያደረገች ሲሆን፥ በቀውቱም ፕሬዚዳንት ኡሁሩ ኬንያታ ማሸነፋቸው መነገሩ ይታወሳል። 

ሆኖም ግን ተቃዋሚ ፓርቲዎች የምርጫው ውጤት ፍትሃዊ አይደለም የአሰራር ክፍተቶች አሉ በማለት ለፍርድ ቤት አቤቱታ ማቅረባቸውን ተከትሎ የሀገሪቱ ጠቅላይ ፍርድ ቤት የምርጫ ውጤቱን ውድቅ ማድረጉ ይታወሳል።

በዚህም መሰረት ምርጫው በዛሬው እለት በድጋሚ በመካሄድ ላይ ይገኛል።

በዚህ ፕሬዚዳንታዊ ምርጫ ከ19 ሚሊየን በላይ የሚሆኑት ዜጎች ለመምረጥ ተመዝግበዋል ነው የተባለው። 

ምንጭ:- ኤፍ ቢ ሲ(FBC)

Advertisement