NEWS: የኢጋድ የውጭ ጉዳይ ሚኒስትሮች ከደቡብ ሱዳን መንግስትና ተቃዋሚዎች ጋር በጁባ ይመክራሉ

                                                         

ምስራቅ አፍሪካ የልማት በይነ መንግስታት (ኢጋድ) የውጭ ጉዳይ ሚኒስትሮች ከደቡብ ሱዳን መንግስትና ተቃዋሚዎች ጋር በጁባ ሊወያዩ ነው።

ኢትዮጵያን ጨምሮ የኢጋድ አባል አገራት ከተለያዩ የደቡብ ሱዳን ሀይሎች ጋር የሚያደርግ ምክክርን ለመቀጠል ዛሬ ወደ ጁባ እንደሚያቀኑም ተነግሯል።

በውይይቱ ላይ የኢፌዴሪ የውጭ ጉዳይ ሚኒስትር ዶክተር ወርቅነህ ገበየሁን ጨምሮ የሱዳን፣ የኬንያ እና የኡጋንዳ የውጭ ጉዳይ ሚኒስትሮች እንዲሁም የጅቡቲና ሶማሊያ የውጭ ጉዳይ ሚኒስትር ዴኤታዎች ይገኛሉ ተብሎ ይጠበቃል።

ባለስልጣናቱ ከደቡብ ሱዳን መንግስት ከፍተኛ ባለስልጣናት እንዲሁም የተቃዋሚ ወገን መሪዎች ጋር ይነጋገራሉ ተብሏል።

የኢጋድ የውጭ ጉዳይ ሚኒስትሮች ቀደሞ ሲልም ወደ ደቡብ አፍሪካ በመሄድ ከቀድሞ የደቡብ ሱዳን ተቀዳሚ ምክትል ፕሬዝዳንት ዶክተር ሬክ ማቻር ጋር መነጋገራቸው ይታወቃል።

ለደቡብ ሱዳን መረጋጋት የተፈረመው ስምምነት ተግባራዊ ሆኖ አገሪቱ ሰላማዊ እንድትሆን ኢጋድ የሚያደርገውን ጥረት አጠናክሮ መቀጠሉንም ከውጭ ጉዳይ ሚኒስትር ቃል አቀባይ ጽህፈት ቤት ያገኘነው መረጃ ያመለክታል።

ምንጭ:- ኤፍ ቢ ሲ(FBC)

Advertisement