NEWS: የኢትዮ ጂቡቲ የባበሩር መስመር በሚያልፍባች አካባቢዎች ከሚኖሩ ዜጎች ጋር ውይይት እየተደረገ ነው

                                                         

በፍቅሩ ወልዱ

የኢትዮ ጂቡቲ የባበሩር መስመር ጥቅምት 29 2010 ወደ አገልግሎት የሚገባ መሆኑን ተከትሎ ባቡሩ በሚያልፍባች አካባቢዎች ከሚኖሩ ዜጎች ጋር ውይይት እየተደረገ ነው።

በዛሬው እለት በአዳማ ከተማ እየተካሄደ ባለው ውይይት፥ የኢትዮጵያ ምድር ባቡር ኮርፖሬሽን ተጠባባቂ ዋና ስራ አስኪያጅ ዶክተር ብርሃኑ በሻን ጨምሮ የሰራ ሀላፊዎች እና የከተማዋ ነዋሪዎች ተሳታፊ ሆነዋል።

በውይይቱ ላይም የባቡር መስመሩ በፍጥነት እንዳይጀምር ያደረጉ ምክንያቶች እስከ ጥቅምት ወር አጋማሽ ሙሉ በሙሉ ይጠናቀቃሉ ተብሏል።

የኢትዮጵያ ምድር ባቡር ኮርፖሬሽን ተጠባባቂ ዋና ስራ አስኪያጅ ዶክተር ብርሃኑ በሻ፥ ከኤሌክትሪክ ጋር ተያይዞ የነበረው ችግር በአሁኑ ጊዜ መፍትሄ አግኝቷል ብለዋል።

ከዚህ ቀደም የጂቢቱ መንግስት ያነሳው ጥያቄ ከአዲስ አበባ እስከ ጂቡቱ ያለው ሙሉ መስመር ሀይል ማግኘት ያለበት ከኢትዮጵያ ነው የሚል የነበረ ሲሆን፥ የኢትዮጵያ መንግስት ደግሞ ከኢትዮጵያ ሄዶ የሚመለሰው ባቡር በጂቡቲ በኩል ሀይል ይጠቀም የሚል ምላሽ ሰጥቶ ነበር።

አሁን ግን የኢትዮጵያ መንግስት ሙሉ በሙሉ የኤሌክትሪክ ለማቅረብ እና ክፍያውንም ከዚህ በፊት ባለው ተመን መሰረት እንዲከፍሉ ውሳኔ ላይ እንደተደረሰ ነው ዶክተር ብርሃኑ የተናገሩት።

ከዋናው መንገድ ወደ ወደብ እና የነዳጅ ማከማቻ ዴፖዎች የሚደረገው የሀዲድ መስመር ግንባታም በመጠናቀቅ ላይ መሆኑን ነው ያነሱት።

የመንገደኞች እና እቃ ዋጋ ተመንም ተጠንቶ ውይይት እየተደረገበት እንደሆነ ነው የተገለፀው።

ከዚህ በፊት ከባቡር መስመሩ ጋር በተያያዘ የማቋረጫ ወይም መሻገሪያ መንገዶች ጋር በተያያዘ እና የባቡር ጣቢያዎች በየአካባቢው ለምን አልተገነቡም በሚል ከውይይቱ ተሳታፊዎች ጥያቄ ተነስቷል። 

የኮርፖሬሽኑ ተጠባባቂ ዋና ስራ አስኪያጅ ዶክተር ብርሃኑ በሻ፥ የማቋረጫ መንገዶቹ ግንባታ ዓለም አቀፍ ደረጃውን በጠበቀ መልኩ በ1 ነጥብ 5 ኪሎ ሜትር ርቀት ላይ ነው የተገነባው ብለዋል።

ሆኖም ግን እንደ አስፈላጊነቱ ተጨማሪ መሻገሪያ ያስፈልጋል ተብሎ በሚታመንባቸው ቦታዎች ላይ ጥናት ተደርጎ ተጨማሪ መሻገሪያዎች ይግነባሉ ነው ያሉት።

የባቡር ጣቢያዎቸን በተመለከተም ኮርፖሬሽኑ በመስመሩ ላይ 30 የባቡር ጣቢያዎች እንዲኖሩት ይፈልግ ነበር ሆኖም ግን አበዳሪዎች ባካሄዱት ጥናት የአካባቢዎቹ የኢኮኖሚ እንቅስቃሴ እምብዛም ባለመሆኑ ወደ 16 ዝቅ መደረጉን ተናግረዋል።

የኢትዮ ጂቡቲ የባበሩር መስመር በአሁኑ ጊዜ የመጨረሻ የባቡር ምልልስ የሙከራ በማድረግ ላይ ይገኛል።

በአሁኑ ሙከራውም ከባድ የሚባሉ ጭነቶችን በመጫን በሰዓት እስከ 120 ኪሎ ሜትር በመጓዝ ነው ሙከራው እየተካሄደ ያለው።

ባቡሩ ሙሉ በሙሉ ወደ አገልግሎት ለመግባት ሙሉ የአንድ ወር ጊዜ የሚቀረው ቢሆንም አሁንም ምንም ያልተሰሩ ቀሪ ስራዎች አሉ።

ለምሳሌ ባቡሩን ያስተዳድራል ተብሎ የሚጠበቀው እና ከኢትዮጵያ እና ከጂቡቱ የተወጣጡ አባላት ያሉት ተቋም እስካሁን ተቋቁሞ ቢሮ አለመከፈትን መመልከት እንችላለን።

እንዲሁም መስመሩን ያስረዳድራል የተባለው ተቋም እስካሁን ከሁለቱም ሀገሮች የተወጣጡ ሰራተኞች አለመቀጠርም ባቡሩ በተያዘለት ጊዜ ወደ ስራ ይገባል የሚለው ላይ ጥያቄ የሚያስነሳ ነው።

Advertisement