NEWS: ኢትዮጵያ የአየር ንብረት ለውጥ ተጽዕኖን ለመቋቋም ለምታከናውነው ተግባር የ75 ሚሊየን ዶላር ድጋፍ አገኘች

                                                         

ኢትዮጵያ የአየር ንብረት ለውጥ ተጽዕኖን ለመቋቋም ለምታከናውነው ተግባር ከተለያዩ ለጋሽ ድርጅቶች 75 ሚሊየን የአሜሪካ ዶላር ማግኘቷን የአካባቢ ደንና አየር ንብረት ለውጥ ሚኒስቴር ገለጸ።

አገሪቷ ለአረንጓዴ ኢኮኖሚ ትግበራና የአየር ንብረት ለውጥ ተጽዕኖን ለመቋቋም ለምታከናውናቸው ተግባራት ከፍተኛ በጀት እንደሚያስፈልጋት በሚኒስቴሩ የአየር ንብረት ለውጥ ትግበራ ማስተባበሪያ ጄኔራል ዳይሬክተር አቶ ደባሱ ባይለየኝ ተናግረዋል።

ለእነዚህ ተግባራት ማከናወኛ በዓመት 7 ነጥብ 2 ቢሊየን የአሜሪካ ዶላር እንደሚያስፈልጋት የሚኒስቴሩ መረጃ ያመላክታል።

ለትግበራው ውጤታማነት የህብረተሰቡ ተሳትፎ ከፍተኛውን ድርሻ የሚይዝ ቢሆንም፤ ገንዘቡን በዘላቂነት ለማግኘት ለተለያዩ ለጋሽ ድርጅቶች ጥያቄዎች እየቀረቡ ነው።

በመሆኑም ከተለያዩ ለጋሽ ድርጅቶች ለአየር ንብረት ለውጥና አረንጓዴ ኢኮኖሚ ስትራቴጂ ትግበራ የሚያግዝ ከ65 ሚሊየን የአሜሪካ ዶላር በላይ መሰብሰብ ተችሏል።

በተመሳሳይ የአየር ንብረት ለውጥ ተፅዕኖን ለመቋቋም ለሚከናወኑ ተግባራት የሚውል 10 ሚሊየን የአሜሪካ ዶላር ተገኝቷል ነው ያሉት አቶ ደባሱ።

ለተለያዩ ድርጅቶች የ50 ሚሊየን የአሜሪካ ዶላር የድጋፍ ጥያቄ መቅረቡን የጠቀሱት አቶ ደባሱ፥ በዚህ ወር መጨረሻ ይፀድቃል ተብሎ እንደሚጠበቅ ጠቁመዋል።

በተጨማሪም ኢትዮጵያ ታዳሽ ኃይልን በመጠቀም ለአየር ንብረት ለውጥ ቅነሳ የምታደርገውን አስተዋጽኦ በማየት እገዛ ለማድረግ የሚመጡ አገራትን በማስተባበር የበጀት ምንጭ የማስፋት ስራ እየተሰራ መሆኑን ሚኒስቴሩ ገልጿል።

ምንጭ:- ኤፍ ቢ ሲ(FBC)

Advertisement