NEWS: መካከለኛው አሜሪካን በመታው ከባድ አውሎ ነፋስ 22 ሰዎች ሞቱ

                                                             

መካከለኛው አሜሪካን በመታው ከባድ አውሎ ነፋስ 22 ሰዎች መሞታቸው ተነገረ።

ኔት የሚል ስያሜ የተሰጠው አውሎ ነፋስ ኮስታሪካ፣ ኒካራጓ፣ ሆንዱራስንና ኤል ሳልቫዶርን መቷል።

እስካሁንም በእነዚህ ሃገራት 22 ሰዎች ሲሞቱ በርካታ ሰዎች መጥፋታቸውም ተነግሯል።

በከባድ ዝናብ የታጀበው አውሎ ነፋስ ከፍተኛ ጎርፍ እና የመሬት መንሸራተትን ሲያስከትል፥ ድልድዮችን ጨምሮ በበርካታ የመሰረት ልማት ተቋማትን ከጥቅም ውጭ አድርጓል።

በኮስታሪካ ስምንት ሰዎች ሲሞቱ፥ ወደ 400 ሺህ የሚጠጉ ዜጎች የንጹህ መጠጥ ውሃ አቅርቦት ተቋርጦባቸዋል።

በኒካራጓ ደግሞ አውሎ ነፋሱ 11 ሰዎችን ሲገድል፥ በሆንዱራስ ሶስት እንዲሁም በኤል ሳልቫዶር አንድ ሰው ሞቷል ተብሏል።

በኮስታሪካ የባቡር ትራንስፖርት አገልግሎት የተቋረጠ ሲሆን፥ በርካታ የአውሮፕላን በረራዎችም ተሰርዘዋል።

በሃገሪቱ በበርካታ ጎብኝዎች የሚዘወተሩ ብሄራዊ ፓርኮችም ስራ አቁመዋል።

አውሎ ነፋሱ በዛሬው እለትም በሆንዱራስ በርካታ አካባቢዎች ከፍ ያለ ጉዳት ያደርሳል እየተባለ ነው።

አውሎ ነፋሱ በቀጣይ ቀናት ጥንካሬን በማግኘትም በአሜሪካ ደቡባዊ ጠረፍ ጉዳት እንደሚያደርስ የአየር ትንበያ ባለሙያዎች እያስጠነቀቁ ነው።

በአሜሪካ የቴክሳስና ፍሎሪዳ ነዋሪዎችም ከአሁኑ ቅድመ ጥንቃቄ እንዲያደርጉ ተነግሯቸዋል።

ቴክሳስና ፍሎሪዳ በዚህ አመት በሃሪኬን ሃርቬይ በሃሪኬን ኢርማ ከባድ የተባለውን ጉዳት አስተናግደዋል።

ምንጭ:- ኤፍ ቢ ሲ(FBC)

Advertisement