NEWS: ፕሬዚዳንት ሙላቱ ከህንዱ አቻቸው ጋር ተወያዩ

                                                        

ፕሬዚዳንት ሙላቱ ተሾመ በኢትዮጵያ ይፋዊ የስራ ጉብኝት እያደረጉ ከሚገኙት የህንዱ አቻቸው ራም ናት ኮቪንድ ጋር ተወያዩ። በውይይታቸውም ህንድ ከኢትዮጵያ ጋር ላላት ግንኙነት ልዩ ትኩረት እንደምትሰጥ ፕሬዚዳንት ራም ናት ኮቪንድ ተናግረዋል። ሀገራቸው ታሪካዊ ግንኙነቱን በንግድ እና በኢንቨስትመንት መስኮች የበለጠ ማጠናከር ትፈልጋለች ነው ያሉት። ህንድ ከአፍሪካ ጋር ለምታደርገው ግንኙነት ኢትዮጵያ ቁልፍ ሚና እንዳላት ነው የገለጹት ፕሬዚዳንቱ። ሀገራቸው የኢትዮጵያን ሁለንተናዊ ጥረት እንደምትደግፍ ጠቅሰው፥ ለሃይል ማሰራጫ ግንባታ የሚውል 195 ሚሊየን የአሜሪካ ዶላር እንደምትሰጥ ቃል ገብተዋል፡፡ ፕሬዚዳንት ሙላቱ በበኩላቸው አሁን ያለውን ግንኙነት የበለጠ ለማጠናከር የመንግስት ፍላጎት መሆኑን ጠቅሰዋል፡፡ ጉብኝቱ ሁለቱ ሀገራት የበለጠ መቀራረባቸውን የሚያሳይ ነው ያሉት ፕሬዚዳንቱ፥ በንግድና ኢንቨስትመንት ያለው ሁለገብ ግንኙነት እንዲጠናከር የኢትዮጵያ ፍላጎት መሆኑን ተናግረዋል፡፡ ዶክተር ቴድሮስ አድሃኖም የዓለም ጤና ድርጅት ዳይሬክተር ጄነራል ሆነው እንዲመረጡ ህንድ ለሰጠችው ድጋፍ ምስጋናቸውን ገልጸዋል፡፡ ኢትዮጵያና ህንድ በአየር ንብረት ለውጥ ላይ እንዲሁም የዓለም አቀፍ ሽብርተኝነትን በጋራ ለመታገል እንደሚሰሩ ከመግባባት ላይ ደርሰዋል፡፡ በዛሬው ጉብኝት በንግድ፣ በኢንቨስትመንት እና ኮሙዩኒኬሽን ዘርፍ የትብብር ስምምነቶች መፈራረማቸውን ከውጭ ጉዳይ ሚኒስቴር ቃል አቀባይ ፅህፈት ቤት ያገኘነው መረጃ ያሳያል። ፕሬዚዳንት ራምናት ኮቪንድ በኢትዮጵያ ከሚኖሩ የህንድ ማህበረሰብ አባላት ጋር ቆይታ ያደረጉ ሲሆን፥ በኢትዮጵያ የማህበረሰብ አቅም ግንባታና የኢኮኖሚ አማራጮችን በመፍጠር የሀገራቸውን መልካም ገጽታ መገንባታቸውን ተናግረዋል። ጠንካራ ሰራተኛ በመሆን ለራሳቸውና ለሀገራቸው ተቀባይነትን መገንባት መቻላቸውን ነው የጠቀሱት። የህንድ ማህበረሰብ አባላት ዮጋ ስፖርትን በኢትዮጵያ እንዲተዋወቅ በማድረጋቸው ምስጋና አቅርበዋል።

ምንጭ:- ኤፍ ቢ ሲ(FBC)

Advertisement