NEWS: የስታዲየም መግቢያ ሰልፍን የሚያስቀር ቴክኖሎጂ በቅርቡ ስራ ላይ ይውላል

                                                              

በአዲስ አበባ ስታዲየም የመግቢያ ትኬት ለመቁረጥ የሚፈጠረውን ረጅም ሰልፍ የሚያስቀር ቴክኖሎጂ ስራ ላይ ሊያውል መሆኑን የኢትዮጵያ እግር ኳስ ፌዴሬሽን አስታወቀ።

የፌዴሬሽኑ የማርኬቲንግ ዳይሬክተር አቶ ኢሳያስ ታፈሰ እንደተናገሩት ቴክኖሎጂው ለዚሁ ስራ በሚከፈቱ ጣቢያዎች፣ በሞባይልና በኢንተርኔት አማካኝነት ጥቅም ላይ ይውላል።

አሰራሩ ቀልጣፋ አገልግሎት መስጠት የሚያስችል እና ትኬት ለመቁረጥ ይፈጠር የነበረውን ረጅም ሰልፍ የሚያስቀር ነው።

እግር ኳስ መመልከት እየፈለጉ በትኬት መቁረጫ ወረፋ ሳቢያ ይቀሩ ለነበሩ ቤተሰቦች፣ ሴቶች እና አካል ጉዳተኞች ምቹ ሁኔታ የሚፈጥር እና ተመልካቾች ወደ ሜዳ እንዲመጡ የሚያበረታታም ነው የተባለው።

ይህ አሰራር ክለቦች ከሜዳ ገቢ ጋር በተያያዘ “ድርሻዬ ከደጋፊዎቼ ጋር የሚመጣጠን አይደለም” በሚል የሚያነሱትን ቅሬታም ይፈታል ተብሏል።

በቴክኖሎጂ በመታገዝ የሚተገበረው አሰራር ባለሜዳው ክለብ በዕለቱ ምን ያህል ደጋፊቹ ወደ ሜዳ እንደገቡ የሚያውቅ በመሆኑ ገቢውን በራሱ መመዝገብ እንደሚችል ተገልጿል።

አገልግሎቱ በዚህ ዓመት የፕሪሚየር ሊግ ሁለተኛ ወይም ሶስተኛ ሳምንት በሚካሄዱ ጨዋታዎች ተግባራዊ እንደሚደረግ ተጠቁሟል።

አዲሱ አሰራር ለጊዜው በአዲስ አበባ ስታዲየም የሚጀመር ሲሆን በሂደት ወደ ክልሎች እንደሚስፋፋ ነው አቶ ኢሳያስ የተናገሩት።

ፌዴሬሽኑ አሰራሩን ተግባራዊ ለማድረግ ክፍያ ፋይናንሺያል ቴክኖሎጂ ከተሰኘ ተቋም ጋር ስምምነት ተፈራርሟል።

አገልግሎቱን የሚሰጠው ክፍያ ፋይናንሺያል ቴክኖሎጂ ከትኬቱ ሽያጭ በሰው ስምንት በመቶ እንደሚያገኝ ተነግሯል።

የአዲሱ አሰራር ወጪ ፌዴሬሽኑ ቀደም ሲል ትኬት ለማሳተም እና ለሽያጭ ሠራተኞች ይከፍል ከነበረው ኮሚሽን ጋር ተመሳሳይ ነው ተብሏል።

ምንጭ:- ኤፍ ቢ ሲ(FBC)

Advertisement