NEWS: ያሆ በፈረንጆቹ 2013 ሁሉም የኢ-ሜይል አድራሻዎች መበርበራቸውን ገለፀ

                                                          

ያሆ በፈረንጆቹ 2013 ሁሉም 3 ቢሊየን የኢ-ሜይል መጠቀሚያ አድራሻዎች በሙሉ መበርበራቸውን ገለፀ።

በተያዘው ዓመት መጀመሪያ በቨሪዞን የተገዛው ኩባንያው በምርምራ የተገኘው የጥቃት መጠን ከታሰበው በላይ መሆኑን ገልጿል።

የመረጃ መረብ ጥቃቱ የመጠቀሚያ ሚስጥራዊ ቁልፎችን፣ የክፍያ ካርድ እና የባንክ የሂሳብ ቁጥሮችን አለማካተቱንም ጠቅሷል።

ያሆ በዚሁ ጥቃት ላይ ከዚህ ቀደም በሰጠው መግለጫ የተበረበሩ አድራሻዎች ብዛት 1 ቢሊየን መሆኑን ጠቅሶ ነበር።

አዲስ ይፋ የተደረገውና በመረጃ ጠላፊዎች የተበረበሩ የኢ-ሜይል አድራሻዎች መብዛት ግን አዲስ የደህንነት ስጋት አይፈጥርም ነው ያለው።

ኩባንያው መረጃ ጠላፊዎቹን በህግ ተጠያቂ ለማድረግ በትኩረት እየሰራ መሆኑንም አስታውቋል።

ያሆ በአሜሪካው ግዙፍ የቴሌኮም ኩባንያ ቨሪዞን ስር መተዳደር የጀመረው ባለፈው የፈረንጆቹ ሰኔ ወር 2017 ነው።

ባለፈው ዓመት ሁለቱ ኩባንያዎች ባደረጉት ድርድር ያሆ የሚሰጠውን የኢንተርኔት አገልግሎት ለቨሪዞን በ4 ነጥብ 8 ቢሊየን የአሜሪካ ዶላር ለመሸጥ ተስማምቶ ነበር።

ሆኖም በ2013 እና በ2014 የመረጃ መረብ ጥቃት እንደደረሰበት በመግለፁ ዋጋው ወደ 4 ነጥብ 5 ቢሊየን የአሜሪካ ዶላር ዝቅ ብሏል።

ምንጭ:- ኤፍ ቢ ሲ(FBC)

Advertisement