NEWS: የላስቬጋሱን ጥቃት ባደረሰው ግለሰብ መኖሪያ ቤትና ባረፈበት ሆቴል ውስጥ 42 የጦር መሳሪያዎች ተገኙ

                                                   

አሜሪካ የላስቬጋሱን ጥቃት ባደረሰው ስቴፈን ፓዶክ መኖሪያ ቤትና ባረፈበት የሆቴል ክፍል ውስጥ 42 የጦር መሳሪያዎች ተገኝተዋል።

ፖሊስ ስቴፈን ፓዶክ የተባለው ግለሰብ “የጃሰን አልደን የሙዚቃ ድግስ” ለመታደም በርካታ ሰዎች በተገኙበት ስፍራ ጥቃቱን አድርሶ በርካቶችን ለህልፈተ ህይወት ዳርጓል ብሏል።

ጥቃት አድራሹ ማንዳላይ ባይ በተባለ ሆቴል 32ኛ ወለል ባረፈበት ክፍል ላይ ሆኖ በሙዚቃ ድግሱ ላይ በተገኙ በሺዎች በሚቆጠሩ ሰዎች ላይ የጥይት ተኩስ ጥቃት ፈፅሟል።

በፖሊስ ተኩስ የተገደለው ፓዶክ ብዙ ሰዎች የጥቃቱ ሰለባ እንዲሆኑ አልሞ ለመተኮስ የማረፊያ ክፍሉን መስኮት ሰባብሮት ተገኝቷል።

የኔቫዳ ግዛት ፖሊስ ባደረገው ፍተሻ በግለሰቡ የሆቴል ማረፊያ ክፍል ውስጥ 23 የጦር መሳሪያ እና ከሆቴሉ በ80 ማይል ርቀት ላይ በሚገኘው መኖሪያ ቤቱ ደግሞ 19 የጦር መሳሪያዎችን አግኝቷል።

የላስ ቬጋስ ከተማ ባለስልጣናት በትናንቱ ጥቃት 59 ሰዎች መሞታቸውን እና 527 መቁሰላቸውን ነው የተናገሩት።

ፖሊስ አሁንም በርካታ የምርመራ እና የፍተሻ ስራዎች እየሰራ መሆኑን ጠቁሟል።

ጥቃት አድራሹ ግለሰብ ከዚሀ ቀደም ምንም ዓይነት የወንጀል ሪከርድ የሌለበት ሆኖ እያለ እንዴት ጥቃቱን ሊፈፅም ቻለ የሚለው ብዙዎችን እያነጋገረ ነው።

በአሁኑ ጊዜ ከጥቃት አድራሹ ጋር ተባባሪ ካለ በማፈላለግ ላይ መሆኑን ነው ፖሊስ ያስታወቀው።

የጦር መሳሪያ ሽያጭ ላይ የተሰማሩ አስተያየት ሰጪዎች ስቴፈን ፓዶክ በርካታ የጦር መሳሪያዎች እንደገዛቸው ገልጸዋል።

የጦር መሳሪያ የግዥ ሂደቱ ግን ህጋዊ ሂደትን የተከተለ መሆኑን ይናገራሉ።

የአሜሪካ የወንጀል ምርመራ ቢሮ (ኤፍ ቢ አይ) ወንጀሉ ከመፈፀሙ በፊት የነበሩ ሁኔታዎችን እየመረመረ ነው።

ፕሬዚዳንት ዶናልድ ትራምፕን ጨምሮ የበርካታ ሀገራት ዜጎች ጥቃቱን አውግዘውታል።

ምንጭ:- FCB(ኤፍ ቢ ሲ)

 

 

Advertisement