NEWS: የኢራኑ የውጭ ጉዳይ ሚኒስትር በኳታር የስራ ጉብኝት ሊያደርጉ ነው

                                                                       

  የኢራኑ የውጭ ጉዳይ ሚኒስትር ሞሃመድ ጃባድ ዛሪፍ በኳታር ይፋዊ የስራ ጉብኝት ሊያደርጉ ነው።

ሚኒስትሩ በኦማን የሚያደርጉትን የስራ ጉብኝት ካጠናቀቁ በኋላ ነው ወደ ዶሃ የሚያመሩት።

ዛሪፍ በጉብኝታቸው በሃገራቱ የሁለትዮሽ ግንኙነት ዙሪያ ይወያያሉ ተብሏል።

ከኢሚር ሼክ ታሚም ቢን አል ታኒ እና የውጭ ጉዳይ ሚኒስትሩ ሼክ ሞሃመድ ቢን አብዱልራህማን አል ታኒ ጋርም ይወያያሉ ነው የተባለው።

በባህረሰላጤው ሃገራት መካከል ያለው ግንኙነትና የኢኮኖሚ ትብብርም የመወያያ አጀንዳቸው እንደሚሆን ነው የሚጠበቀው።

ከዚህ ባለፈም በሶሪያ፣ ኢራቅና የመን ባለው ወቅታዊ ሁኔታ ላይ እንደሚመክሩም ይጠበቃል።

የዛሪፍ ጉብኝት በሳዑዲ ዓረቢያ የሚመሩት አራት የባህረ ሰላጤው ሃገራት ከዶሃ ጋር ያላቸውን ግንኙነት በይፋ ካቋረጡበት ያለፈው ሰኔ ወር ወዲህ የመጀመሪያው ይሆናል።

ሃገራቱ ዶሃ አሸባሪዎችን እንዲሁም አክራሪነትና ፅንፈኝነትን የሚሰብኩ የሃይማኖት ተቋማትና አስተምህሮዎችን ትደግፋለች በሚል ዲፕሎማሲያዊ ግንኙነታቸውን በይፋ ማቋረጠጣቸው ይታወሳል።

ከዚያን ጊዜ ወዲህም ኳታር ከቴህራን ጋር ያላትን ወዳጅነት ስታጠናክር ቆይታለች።

የአሁኑ የዛሪፍ ግንኙነትም በአካባቢው ሃገራት ለተገለለችው ዶሃ መልካም ዜና ይሆናል ተብሏል።

ምንጭ:- FBC (ኤፍ ቢ ሲ)

 

Advertisement