NEWS: አንድ ሰው በሚያወጣው የሲም ካርድ መጠን ላይ ገደብ በመጣሉ ወንጀሎችን መቆጣጠር መቻሉን ኢትዮ ቴሌኮም አስታወቀ

                                                                                  

አንድ ግለሰብ ከአምስት በላይ ሲም ካርዶችን በስሙ እንዳያወጣ የሚቆጣጠረውን ዘመናዊ ቴክኖሎጂ በመተግበሩ በተንቀሳቃሽ ስልኮች የሚፈጸሙ ወንጀሎችን መቆጣጠር መቻሉን ኢትዮ ቴሌኮም አስታወቋል።

አስተያየታቸውን ለፋና ብሮድካስቲንግ ኮርፖሬት የሰጡ የአዲስ አበባ ነዋሪዎች መካከል፥ ሲም ካርድ መግዛታቸውን እንጂ አሁን ላይ ሲም ካርዶቹ የት እንዳሉና ለምን አገልግሎት እየሰጡ እንደሆነ እንደማያወቁ የተናገሩ አሉ።

ኢትዮ ቴሌኮም የመገናኛ መረቡን ከመረጃ ምንተፋ የፀዳ ለማድረግና የሚፈጸሙ ወንጀሎችን ለመከላከል፥ አንድ ግለሰብ ከአምስት በላይ ሲም ካርዶችን በስሙ ማውጣት እንዳይችል የሚከለክል አሰራር ተግባራዊ ማድረጉን ገልጿል።

የተፈቀዱት አምስት ሲም ካርዶችም ቢሆኑ የቤተሰብ አስተዳዳሪ ለአቅመ አዳምና ሄዋን ላልደረሱ ልጆች የስልክ አገልግሎት ተጠቃሚ እንዲሆኑ ለማስቻል ማውጣት እንዲችል የታሰበ መሆኑ ነው የተነገረው።

ይሁን እንጂ በኢትዮ ቴሌኮም የኮርፖሬት ኮሙዩኒኬሽን ሃላፊው አቶ አብድራሂም አህመድ እንደሚገልፁት፥ አሰራሩ ከታሰበለት ዓላማ ውጪ ሲተገበር ቆይቷል።

የሲም ካርድ ሽያጩ የኢትዮ ቴሌኮም ወኪል በሆኑ ሱቆች ሲሸጥ በነበረበት ወቅት፥ አንድ ግለሰብ ከተለያዩ ቦታዎች በወረቀት ላይ በሚሰፍር መረጃ ብቻ ሲም ካርድ ያለገደብ በመግዛት ለሶስተኛ ወገን ጭምር አሳልፎ ይሰጥ ነበር።

ምናልባትም ግለሰቡ የገዛው ሲም ካርድ ቢጠፋ መስመሩ አገልግሎት እንዳይሰጥ ለኢትዮ ቴሌኮም መረጃውን እስካልሰጠ ድረስ ሲም ካርዱን ያገኘ ግለሰብ ወንጀልን ጨምሮ ለተለያዩ አገልግሎቶች ሊጠቀምበት ይችላል።

በወቅቱ በግለሰብ መሸጫ ሱቆች በወረቀት ምዝገባ ብቻ ይሸጡ የነበሩት በሺዎች የሚቆጠሩ ሲም ካርዶች ወደ ኢትዮ ቴሌኮም የመረጃ ቋት ሳይመዘገቡ ዓመታት ተቆጥረዋል።

ይህንን ችግር ለመቅረፍ ኢትዮ ቴሌኮም ከሶስት ዓመት ወዲህ ዘመናዊ አሰራርን መከተሉን የኮርፖሬት ኮሙዩኒኬሽን ሀላፊው አቶ አብድራሂም ይናገራሉ።

በዚህ ወቅት የኢትዮ ቴሌኮም የተንቀሳቃሽ ስልክ ደንበኞች 58 ሚልየን ሲሆን፥ ከ5 ሺህ በላይ የሚሆኑት በወረቀት በነበረ ምዝገባ ከሶስት ዓመት በፊት የአገልግሎቱ ተጠቃሚ የሆኑ ናቸው።

እነዚህ ደንበኞች ኢትዮ ቴሌኮም ባሉት ጣቢያዎች በመሄድ የዳግም ምዝገባ ስርዓቱን እንዲያሟሉ ጥሪ በመደረጉ ወደ ማዕከላዊው የኢትዮ ቴሌኮም የመረጃ ቋት እየገቡ እንደሆነ አቶ አብድራሂም አንስተዋል።

አሁን ላይ ኩባንያው በተቋሙ የመሸጫ ማእከላትና በህጋዊ ወኪሎቹ አማካኝነት የሲም ካርድ ሽያጭን ኢ-ካርድ በተሰኘ መሳሪያ በመታገዝ በማከናወን ላይ ይገኛል።

ከዚህ ውጭ ሽያጭ የሚያከናውን ግለሰብም ሆነ ሱቅ ህገወጥ እንደሆነ ነው አቶ አብድራሂም የተናገሩት።

እንደ አቶ አብድራሂም ገለፃ ኢ-ካርድ የተሰኘው መሳሪያ ዘመናዊ በሆነ መንገድ የሲም ካርድ ተጠቃሚውን ግለሰብ የተሟላ መረጃ ከምስል ጋር አስደግፎ መያዝ የሚያስችል ነው።

ከሲም ካርድ አጠቃቀም ጋር በተያያዘ አገልግሎቱን ለህገወጥ ተግባራት ሲጠቀሙ የተገኙ ግለሰቦችንና ተቋማትን በህግ ተጠያቂ እንዲሆኑ እየተደረገ መሆኑን ነው ከተቋሙ ያገኘነው መረጃ የሚያሳየው።

ከዚሁ ጋር በተያያዘም በርካታ ግለሰቦችና ተቋማት ላይ በውስጥ አሰራር የምርመራ ሂደት፥ በ51 መዝገቦች ተደራጅቶ ምርምራና ክትትል እየተደረገባቸው እንደሆነም አቶ አብዱራሂም ጠቁመዋል።

 

ምንጭ:- ኤፍ ቢ ሲ(FBC)

 

Advertisement