NEWS: አንጌላ ሜርክል ለ4ኛ ጊዜ የጀርመን መራሂተ መንግስት ሆነዋል

                                                         

በጀርመን ትናንት በተካሄደው አጠቃላይ ምርጫ የአንጌላ ሜርክል  ፓርቲ አብላጫ መቀመጫ በማግኘቱ ለአራተኛ ጊዜ በድጋሚ የሀገሪቱ መራሂተ መንግስት መሆናቸውን አረጋግጠዋል።

ፓርቲያቸው ክርስቲያን ዴሞክራቲክ ፓርቲ ግን በ70 ዓመት ታሪክ አጋጥሞት የማያውቀው ዝቅተኛ ድምጽ ማግኘቱ የተነገረ ሲሆን፥ ሆኖም ግን አሁንም በፓርላማው ውስጥ አብላጫውን መቀመጫ አግኝቷል።

በምርጫውም የአንጌላ ሜርክል ፓርቲ 33 በመቶ ወንበር ሲያገኝ፥ ከሜርክል ጋር በመፎካካር ላይ የነበሩት የማርቲን ሹልዝ ሶሻል ዴሞክራቲክ ፓርቲ ደግሞ 20 ነጥብ 5 በመቶውን ማግኘት ችሏል።

እንዲሁም ኤ.ኤፍ ዲ ፓርቲ በጀርመን ፓርላማ ውስጥ ለመጀመሪያ ጊዜ መቀመጫ ማግኘት የቻለ ሲሆን፥ በአጠቃላይም 12 ነጥብ 6 በመቶ መቀመጫን ይዟል።

merekel_win_2.png

የምርጫ ውጤቱን ተከትሎም በጀርመን አንዳንድ አካባቢዎች የተቃውሞ ሰልፎች በበርሊን፣ ፍራንክፈርት እና ኮሎኝ ተካሂደዋል።

በተለይም ሙስሊሞችን በማግለል የሚታወቀው የቀኝ ዘመም ፓርቲ ዋና መስሪያ ቤት ፊት ለፊት በተደረገ ሰልፍ “ስደተኞችን እንቀበላለን” የሚሉ ጽሁፎች ታይተዋል።

ለ12 ዓመታት ጀርመንን በመራሂተ መንግስትነት የመሩት አንጌላ ሜርክል ለደጋፊዎቻቸው ባደረጉት ንግግርም፥ ከሀገራቸው ህዝብ ጋር በመሆን ለተሻለ ለውጥ እንደሚሰሩ ገልፀዋል።

ሜርክል አክለውም፥ ፓርቲያቸውን ያልመረጡትን ሰዎች ሀሳብ፣ ፍራቻ እና ጭንቀት በጥልቀት በመመልከት ድምጻቸውን መልሰው ለማግኘት እንደሚሰሩም አስታውቀዋል።

የሀገሪቱ መንግስት በቀጣይም በኢኮኖሚ፣ በደህንነት እና ስደተኝነትን ከምንጩ በማስቆም ዙሪያ ላይ እንደሚሰራም ቃል ገብተዋል።

ምንጭ:- ኤፍ ቢ ሲ(FBC)

Advertisement