NEWS: ፌስቡክ ከሩሲያ የምርጫ ጣልቃ ገብነት ጋር የተገናኙ 3 ሺህ ማስታዎቂያዎችን ለአሜሪካ ኮንግረስ ለመስጠት ወሰነ

                                   

የፌስቡክ መስራች ማርክ ዙከርበርግ ኩባንያቸው በአሜሪካ ፕሬዚዳንታዊ ምርጫ ከሩሲያ ጣልቃ ገብነት ጋር ግንኙነት ያላቸውን 3 ሺህ የፖለቲካ ማስታዎቂያዎች ለአሜሪካ ኮንግረስ የ2016 የምርጫ ጣልቃ ገብነት መርማሪ ኮሚቴ እንደሚሰጥ አስታወቀ።

ዙከርበርግ በኩባንያው ማህበራዊ ገፅ የሚተላለፉ የፖለቲካ መልዕክቶች የበለጠ ግልፅ እንዲሆኑ ይሰራል ነው ያለው።

ለቀጥታ ኢንተርኔት የፖለቲካ ማስታዎቂያዎች ግልፅነት ጠንካራ መመዘኛ ለማውጣት ከሌሎች አጋሮች ጋር ዝግጅት እያደረግን ነው ብሏል።

የፖለቲካ ማስታዎቂያዎች በአሁኑ ወቅት ሃላፊነት የሚወስድላቸው ባለቤት ወይም የድርጅት ማንነት ባለመታወቁ ጥያቄ እያስነሱ መሆኑንም ጠቅሷል።

ፌስቡክ ሩሲያን ጨምሮ የማስታወቂያ ቅርፁን እና ይዘቱን ወደ አልተፈለገ አቅጣጫ እንዲያመራ የሚሞከሩ የውጭ አካላትን እና የቀድሞ የሶቪየት ሀገራትን እያጣራ ነው።

ኩባንያው “ሩሲያ በአሜሪካ ምርጫ ጣልቃ ገብታልች” ከሚለው ጋር የተገናኙ መረጃዎችን ለምርመራ ኮሚቴው አሳልፎ ለመስጠት የወሰነው በደረሰበት ግልፅ የማድረግ ህዝባዊ ግፊት ነው የሚሉ ሰዎች አሉ።

ከዚህም ባሻገር የአሜሪካ መንግስት እውቅና ሊነፍገው እንደሚችል እና ጠንካራ ቁጥጥር እንደሚጣልበት ማስጠንቀቂያ ስለደረሰው ነው ያሉ ወገኖችም በሌላ በኩል ይገኛሉ።

በዚህ ወር መጀመሪያ ፌስቡክ ሩሲያ በአሜሪካ የ2016 ፕሬዚዳንታዊ ምርጫ ጣልቃ ገብታ ሊሆን እንደሚችል የሚያሳዩ መረጃዎች መኖራቸውን መጠቆሙ ይታወሳል።

መረጃው ለአንድ ወገን ያደሉት ማስታወቂያዎች ዝርዝር ይዘት ምን እንደሆነ አልጠቀሰም፤ ሆኖም በስደተኞች ላይ ያተኮሩ ዓቢይ ጉዳዮች መኖራቸውን አመላክቷል።

ታዲያ አሁን ላይ ኩባንያው የ2016 የአሜሪካ ፕሬዚዳንታዊ ምርጫን በተመለከተ የሩሲያን ጣልቃ ገብነት ለሚመረምርው ኮሚቴ ዝርዝር መረጃዎችን ለማቅረብ መዘጋጀቱን ነው ያሳወቀው።

የፌስቡክ የፖሊሲ ሃላፊ ኤሊዮት ሽሬግ ፌስቡክ ጥልቅ የፖሊሲና የህግ ጉዳዮችን ከመረመረ በኋላ የተጠቃሚዎች የመረጃ ደህንነት እንዲረጋገጥና መንግስት የምርጫውን ጣልቃ ገብነት መርመር እንዲያረጋግጥ ለማገዝ መወሰኑን ተናግረዋል።

የዴሞክራቱ ሴናተር እና የምርመራ ኮሚቴው ምክትል ሊቀመንበር ማርክ ዋርነር የፌስቡክን ውሳኔ አድንቀዋል።

የክሬምሊን ቃል አቀባይ ዲሚትሪ ፔስኮቭ በያዝነው ወር መጀመሪያ ሩሲያ ፈስቡክ ከጠቀሳቸው ማስታወቂያዎች ጋር ግንኙነት የላትም ማለታቸው ይታወሳል።

ዙከርበርግ የፖለቲካ ማስታወቂያዎች በተሌቪዥንና መሰል ሚዲያ በሚቀርቡበት ጊዜ ክፍያውን ማን እንደፈፀመ በግልፅ ማሳወቅ እንዳለበት ህግ እንደሚያስገድደው ሁሉ፥ ፌስቡክም የበለጠ ግልፅ መርህን ለመከተል ወስኗል ብሏል።

በመጪው እሁድ ለሚካሄደው የጀርመን ምርጫ ውጤት ታማኝነት እና የመረጃ ደህንነት ኩባንያው እንደሚሰራ ጠቁሟል።

ምንጭ:- ኤፍ ቢ ሲ(FBC)

 

Advertisement