NEWS: የአዲስ አበባ ጅቡቲ የአስፓልት መንገድ በወቅቱ አለመጠገን በንብረት ላይ ጉዳት እያደረሰ ነው – የተሽከርካሪ ባለንብረቶች

                                       

በንብረቴ ተሆነ

ከአዲስ አበባ ጅቡቲ ወደብ ድረስ ያለው የአስፓልት መንገድ በወቅቱ የጥገና ስራ ባለመሰራቱ ተሽከርካሪዎች ለጉዳት እየተዳረጉ መሆኑን የደረቅ ጭነት ማመላሻ ተሽከርካሪ ባለንብረቶች ገልፀዋል።

ለፋና ብሮድካስቲንግ ኮርፖሬት ቅሬታቸውን ያቀረቡት ባለንብረቶቹ፥ የመንገዱ ብልሽት 150 ኪሎ ሜትር መንገድ ለመጓዝ ከአንድ ቀን በላይ እየፈጀብን ነው ብለዋል።

ከአዲስ አበባ ጅቡቲ ያለው የአስፓልት መንገድ ብቸኛው የወደብ መስመር መሆኑ፥ 24 ሰዓት ሙሉ ከባድ ተሽከርካሪዎች በመንገዱ ላይ ይጓዛሉ።

በመስመሩ ላይ የሚደረገው ከፍተኛ ምልልስ የአስፓልት መንገዱ ለጉዳት ተጋላጭ እንዲሆን አድርጎታል።

የደረቅ ጭነት ማመላሻ ባለንብረቶችም አሁን ላይ መንገዱ ለብልሽት መዳረጉ በጉዟቸው ላይ ከፍተኛ ችግር እንደፈጠረባቸው ይናገራሉ።

የኢትዮጵያ መንገዶች ባለስለጣን የተሽከርካሪ ባለቤቶች የሚያነሱት ቅሬታ እውነት ነው ብሏል።

በመስመሩ ላይ የሚደረገው ከፍተኛ ምልልስ ለአስፓልት መንገዱ ብልሽት ምክንያት ነው ያለው ባለስልጣኑ፥ ችግሩን ለመፍታት 3 ነጥብ 5 ቢሊየን ብር ተመድቦ የጥገና እና ደረጃ የማሻሻል ስራ ተጀምሯል ብሏል።

የባለሰልጣኑ የኮሙኒኬሽን ተወካይ ዳይሬክተር አቶ ደረጀ ሀይሉ፥ የጥገና ስራው በአራት ምእራፍ ተከፋፍሎ እየተሰራ መሆኑን ተናግረዋል።

የመንገዶች ባለስልጣን እስከድንበር ደረስ ያለው የመንገዱ የጥገና ስራ በሚቀጥለው ጥር ወር መጀመሪያ ላይ ሙሉ በሙሉ ይጠናቀቃል ብሏል።

ለመንገዱ ብልሽት በምክንያትነት ከሚጠቀሱ ጉዳዮች ሌላኛው ከመጠን በላይ ጭነት ነው።

ለዚህ ችግር መንገዱን በባለቤትነት የሚያስተዳድረው የመንገዶች ባለሰልጣን ቁጥጥር አናሳ መሆን ይነሳል።

የኮሙኒኬሽን ተወካይ ዳይሬክተሩ አቶ ደረጀ ሀይሉም፥ እስካሁን ድረስ በመንገዱ ላይ ከተፈቀደው ክብደት በላይ በጫኑ ተሽከርካሪዎች ላይ ከግንዛቤ ስራ ያለፈ እርምጃ አልተወሰደም ይላሉ።

ባለስልጣኑ ከተፈቀደው ክብደት በላይ በጫኑ ተሽከርካሪዎች ላይ እርምጃ በተገቢው መንገድ ላለመውሰዱ የህግ ክፍተቶች እና ዘመናዊ የሚዛን መቆጣጠሪያ መሳሪያዎች እጥረት እንደምክንያት ይነሳሉ።

የተሽከርካሪዎችን ክብደት መመዘኛ ጣቢያዎችን የማዘመን ስራ እየተሰራ ነው ያሉት አቶ ደረጀ፥ ከዚህ በኋላ ከክብደት በላይ የጫነ ተሽከርካሪ በመንገዱ አያልፍም ብለዋል።

ቅሬታቸውን ለፋና ብሮድካስቲንግ ኮርፖሬት ያቀረቡ የተሽከርካሪ ባለቤቶች የመንገዱ የብልሽት መጠን ከድንበር በኋላ ያለው ከአቅም በላይ መሆኑን ገልፀዋል።

የትራንስፖርት ሚነስትር ዲኤታ አቶ አብዲሳ ያደታ በበኩላቸው፥ ከድንበር በኋላ ያለው የመንገድ ችግር መቼ ይፈታል የሚለውን ጉዳይ ማወቅ ባይቻልም፤ በጉዳዩ ላይ ኢትዮጵያ እና ጅቡቲ እየተነጋገሩበት ነው ብለዋል።

ምንጭ:- ኤፍ ቢ ሲ(FBC)

Advertisement