NEWS: ለመዲናዋ የቀላል ባቡር ፌርማታዎች የተገጠሙ አሳንሰሮች ስራ ሳይጀምሩ 2 ዓመት ሞልቷቸዋል

                                           

በባርናባስ ተስፋዬ

 የአዲስ አበባ ቀላል ባቡር ካሉት 39 ፌርማታዎች ዘጠኙ በከፍታ ድልድዮች ላይ አንዱ ደግሞ በዋሻ ውስጥ ይገኛሉ

እነዚህን ፌርማታዎች ተደራሽ ለማድረግ አሳንሰሮች ቢተከሉም አገልግሎት ሳይሰጡ ሁለት ዓመት ተቆጥሯል። 

ዕለታዊ የቀላል ባቡር ተጠቃሚዎች ቁጥር አሁን ላይ አሻቅቧል፤ ቀላል ባቡሩ በከተማዋ አራት አቅጣጫዎች በሚሰጠው አገልግሎትም ሁለት ዓመታትን አስቆጥሯል።

አገልግሎቱ የማህበረሰቡን የትራንስፖርት ችግር ማቃለል ዓላማው ሆኖ እየሰራ ቢሆንም ለአቅመ ደካማ፣ አዛውንቶች እና አካል ጉዳተኞችን ግን ተደራሽ መሆን ተስኖታል።

የ90 አመቱ ዕድሜ ባለፀጋ አቶ ይመር በለጠ፥ መድረሻቸው ልደታ ሆኖ ለአቅaማቸው የሚመች መውረጃ ፍለጋ አልፈው እንዲሄዱ መገደዳቸውን ገልጸዋል።

የዚህም ዋና ምክንያት ደግሞ የባቡር አገልግሎት በመዲናዋ ሲጀመር ከጎኑ ስራ ይጀምራሉ የተባሉት መወጣጫ አሳንሰሮች ዛሬም ድረስ አገልግሎት አለመስጠታቸው ነው።

የባቡር መስመሩ የመንገደኞች መሳፈርያ እና መውረጃ ጣብያዎች በዘጠኙ የድልድይ ላይ እና በአንዱ የዋሻ ውስጥ ጣቢያዎች ላይ በሚገኙ ከ22 በላይ የሆኑት አሳንሰሮች ስራ እንዲጀምሩ ጥያቄው የመጣው ከባቡር አገልግሎቱ መጀመር ጋር እኩል ነው።

የፕሮጀክት ተቆጣጣሪው ሼንዜን ሜትሮ ኩባንያም ሆነ ግንባታውን ያከናወነው ሲ.አር.ኢ.ሲ. ኩባንያ የሚያቀርቧቸውን ምክንያቶች ከመቀበል ውጪ ሌላ አማራጭ እንዳልነበር የኢትዮጵያ የምድር ባቡር ኮርፖሬሽን ህዝብ ግንኙነት ሀላፊ አቶ ደረጀ ተፈራ ይናገራሉ።

ከአጠቃቀም አንፃር ብልሽት እንዳይገጥማቸው ተቆጣጣሪ መቅጠር እንደሚያስፈልግ ሃሳብ ማቅረብ የመጀመርያው ጉዳይ ነበር።

አሳንሰሮቹ መስራት ባይችሉም እንደ አማራጭ ሊፍት ማቅረብ እንደሚገባ የምድር ባቡር ኮርፖሬሽን በሃሳብ እንስቶ እንደነበርም ተጠቁሟል።

ይሄም ቢሆን መወጣጫዎቹ ስራ እንዲጀምሩ ባለመደረጋቸው ከተገጠሙት ጊዜ አንስቶ ባሉበት እንዳሉ ተገልጿል።

ለመጨረሻ ጊዜ ከተዋዋዮቹ ኩባንያዎች ከፍተኛ የስራ ሃላፊዎች ጋር ውይይት የተደረገው ባለፈው ወር እንደነበር ተጠቁሟል።

ለዚህ ጥያቄ ትክክለኛ ምላሽ በአንድ ወር ውስጥ ለመስጠት ያኔ ቃል ተገብቷል። ነገር ግን አሳንሰሮች አገልግሎት ባለመስጠታቸው ምክንያት ምድር ባቡር ኮርፖሬሽን፥ ከተቋራጩ ጋር ባደረኩት ድርድር ለውጥ ስላልመጣ ወደ ህግ ለመሄድ እገደዳለሁ ብሏል።

“ለህብረተሰቡ ልንሰጥ ቃል የገባንለትን አገልግሎት አላቀረብንም” የሚለውን የተጠያቂነት ጉዳይ በመያዝ ጉዳዩ ወደ ህግ ይሄዳል ነው የተባለው።

ምንጭ:- ኤፍ ቢ ሲ(FBC) 

Advertisement