NEWS: በሜክሲኮ በደረሰ የመሬት መንቀጥቀጥ አደጋ ከ220 በላይ ሰዎች ህይወት አለፈ

                                                                          

 በማእከላዊ ሜክሲኮ የደረሰ የመሬት መንቀጥቀት አደጋ በርካቶችን ለሞት ሲዳርግ፥ በሜክሲኮ ከተማ የሚገኙ በርካታ ህንጻዎችንም ደርምሷል።

በመሬት መንቀጥቀጥ አደጋውም እስካሁን የ226 ሰዎች ህይወት ማለፉ የተረጋገጠ ሲሆን፥ በርካቶች አሁንም የገቡበት አልታወቀም።

የሜክሲኮ ፕሬዚዳንት ኤንሪኬ ፔና፥ በመሬት መንቀጥቀጡ ትምህርት ቤት ተደርምሶ ከ20 በላይ ህጻናት ህይወታቸው ማለፉን እና 30 ህጻናት እስካሁን የገቡበት አልመታወቁን ተናግረዋል።

በሬክተር ስኬል መለኪያ 7 ነጥብ 1 ማግኒቲዩድ የተመዘገበው ርእደ መሬቱ፥ ከሜክሲኮ በተጨማሪ አጎራባች ሀገራት ላይ ጉዳት አድርሷል ነው የተባለው።

የሚክሲኮ የሲቪል ደህንነት ጥበቃ ኤጀንሲ ቃል አቀባይ እንደተናገሩት፥ እስካሁን በመላው ሀገሪቱ በርእደ መሬቱ ሳቢያ ከ226 ሰዎች በላይ መሞታቸው ተረጋግጧል ብለዋል።

ከእነዚህም ውስጥ 55 ሰዎች በሞሬሎስ ግዛት እንዲሁም 32 ሰዎች ደግሞ በፔውብላ ግዛት መሞታቸውን ያረጋገጠው ኤጀንሲው፥ 49 ሰዎች በሜክሲኮ ሲቲ ሌሎች ደግሞ በሌሎች 10 የሜክሲኮ ግዛቶች ውስጥ ህይወታቸው አልፏል ብሏል።

በሜክሲኮ ዋና ከተማ ሜክሲኮ ሲቲ ውስጥ ከሚኖሩት ሰዎች ውስጥም ከ2 ሚሊየን በላይ ሰዎች በመሬት መንቀጥቀጡ ሳቢያ የስልክ እና የኤሌክትሪክ አገልግሎት እንደተቋረጠባቸውም ተነግሯል።

የሜክሲኮ ከተማ ከንቲባ ሚጌል ማንሴራ በቴሌቪዥን በሰጡት መግለጫ፥ የአደጋ ጊዜ ሰራተኞች በ44 ስፍራዎች ላይ በህንጻዎች ፍርስራሽ ስር ያሉትን ለማውጣት እየሰሩ መሆኑን ተናግረዋል። 

የሜክሲኮ ፕሬዚዳንት ኤንሪኬ ፔና በበኩላቸው፥ በአሁኑ ጊዜ አደጋው በደረሰባቸው አካባቢዎች ላይ የአስቸኳይ ጊዜ አዋጅ ታውጇል ብለዋል።

የሀገሪቱ ጦርም አደጋው ወደ ደረሰባቸው ስፍራዎች በማቅናት የአደጋ ጊዜ ሰራተኞችን የመደገፍ ስራ እንደሚሰሩም አስታውቀዋል።

ከዚህ በተጨማሪም በ10 ሺህዎች የሚቆጠሩ የሜክሲኮ ከተማ ነዋሪዎች ያለምንም የድጋፍ መሳሪያ ባዶ እጃቸውን ተጎጂዎችን ለመርዳት እየሰሩ ይገኛሉ ተብሏል።

የሜክሲኮ ከተማ በዓለማችን ላይ በርካታ ሰዎች ከሚኖሩባቸው ከተሞች አንዷ ስትሆን፥ በአሁኑ ጊዜ በተከተማዋ ውስጥ ብቻ ከ20 ሚሊየን በላይ ሰዎች ነው የሚኖሩት።

በሀገሪቱ ከአንድ ወር በፊት በሬክተር ስኬል 8 ነጥብ 1 ማግኒቲዩድ በተመዘገበ ርእደ መሬት መመታቷ ይታወሳል።

በዚህ የመሬት መንቀጥቀጥ አደጋም ከ90 በላይ ሰዎች እንዳለፈ ነው የተነገረው።

ሀገሪቱ ከ32 ዓመታት በፊት በተመሳሳይ ወቅት የመሬት መንቀጥቀጥ አደጋ ደርሶባት የነበረ ሲሆን፥ በአደጋውም ከ1 ሺህ በላይ ሰዎች ሞተዋል።

ምንጭ:- ኤፍ ቢ ሲ(FBC)

Advertisement