NEWS: በአፋር ክልል በተወሰኑ ወረዳዎችና ከተሞች በጎርፍ ምክንያት የኤሌክትሪክ አገልግሎት ተቋረጠ

                                             

በአፋር ክልል ሎግያ ከተማ በሎግያ ወንዝ ዳርቻ ተተክሎ በነበረ የኤሌክትሪክ ኃይል መስመር ተሸካሚ ምሰሶ ላይ በደረሰ የጎርፍ አደጋ በተወሰኑ የክልሉ ከተሞች የኤሌክትሪክ አገልግሎት ተቋረጠ፡፡

በሰሜን ምስራቅ ሪጂን የትራንስሚሺንና ኦፕሬሺን ቢሮ ኃላፊ አቶ ታገል ደገፋ እንደተናገሩት ከኮምቦልቻ ሰመራ የተዘረጋው ከፍተኛ የኤሌክትሪክ ኃይል መስመር ተሸካሚ ምሰሶ ዛሬ ከንጋቱ 12፡00 ሰዓት ላይ በተከሰተ ጎርፍ ወድቋል፡፡

በዚህም ምክንያት መስመሩ በመቆረጡ ከሰመራ ንኡስ ጣቢያ ኃይል ያገኙ የነበሩ ሰመራ-ሎግያ፣ ሚሌ፣ ኤሊወሃ፣ ዱብቲና አይሳኢታ እንዲሁም ኤሊደአር ወረዳዎች መብራት ለአንድ ሳምንት ያህል እንደማያገኙ ተነግሯል፡፡

በጎርፉ ምክንያት በከፍተኛ የኤሌክትሪክ ሃይል መስመር ተሸካሚ ምሰሶው ላይ የደረሰው ጉዳት በገንዘብ ሲተመት ከ2 ሚሊዮን ብር በላይ ይገመታል ተብሏል፡፡ 

የሀይል ተሸካሚ ምሰሶውን በዘላቂነት ለመጠገን እስከ ሁለት ወር ጊዜ የሚወስድ ይሆናል።

ስለሆነም ህብረተሰቡ በግዚያዊነት በአንድ ሳምንት ውስጥ መብራት ማገኘት የሚቻልበት ሁኔታዎችን ለማመቻቸት ቢሮው ባለሙዎችን ወደ አካባቢው በመላክ ጥረት እያደረገ ይገኛል፡፡

በክልሉ ተመሳሳይ የአደጋ ስጋት በሚታይባቸው አካባቢዎች ላይም የማጠናከሪያ ስራዎችን እየተከናወነ መሆኑን ኃላፊው ተናግረዋል፡፡

ምንጭ:- ኤፍ ቢ ሲ(FBC)

Advertisement