NEWS: ሰሜን ኮሪያ የተሳካ የሃይድሮጅን ቦምብ ሙከራ ማድረጓን አስታወቀች

                                            

ሰሜን ኮሪያ የተሳካ የሃይድሮጅን ቦምብ ሙከራ ማድረጓን አስታወቀች።

ፒዮንግያንግ ስድስተኛውን የኒውክሌር ሙከራ በተሳካ መልኩ ማድረጓን የሃገሪቱ ብሄራዊ የቴሌቪዥን ጣቢያ ገልጿል።

በዛሬው እለት የተሞከረው የሃይድሮጅን ቦምብ በረጅም ርቀት ተምዘግዛጊ ሚሳኤል መወንጨፍ የሚችል መሆኑንም ጣቢያው አስታውቋል።

ፒዮንግያንግ የስነ ምድር ባለሙያዎች በዛሬው እለት በሃገሪቱ ከፍተኛ የመሬት ንዝረት መከሰቱን ከገለጹ ከሰዓታት በኋላ ነው ሙከራ ማድረጓን የገለጸችው።

የዛሬው ሃይድሮጅን ቦምብም ከእስካሆኑቹ የፒዮንግያንግ ቦምቦች ጠንካራ ነው ተብሏል፤ በሬክተር ስኬል 6 ነጥብ 3 የተመዘገበ ንዝረትም አስከትሏል።

የጃፓንና የደቡብ ኮሪያ ባለስልጣናትም በዛሬው እለት የተሞከረው ቦምብ ከአንድ አመት በፊት ከተደረገው በ10 እጥፍ የሚበልጥ የመሬት ንዝረት አስከትሏል ነው ያሉት።

ቦምቡ ከዚህም ባለፈም በሃገር አቋራጭ ሚሳኤሎች የመወንጨፍ አቅም እንዳለውም ሰሜን ኮሪያ ገልጻለች።

የአሁኑ የፒዮንግያንግ ሙከራ ግን የኪም ጆንግ ኡን አስተዳደር ላይ ከባድ ውግዘትን እያስከተለ ነው።

ሩሲያና ቻይናን ጨምሮ በርካቶች ድርጊቱን አግባብነት የሌለው በማለት ኮንነውታል።

ጃፓንና ደቡብ ኮሪያ ደግሞ ፒዮንግያንግ ላይ ጠንከር ያለ ተጨማሪ ማዕቀብ ሊጣል ይገባል እያሉ ነው።

ፈረንሳይ በበኩሏ አስፈላጊው እርምጃ ሊወሰድ እንደሚገባና ሃገራትም በጉዳዩ ላይ ወደ ውሳኔ እንዲገቡ ጠይቃለች።

ምንጭ:- FBC (ኤፍ ቢ ሲ)

 

Advertisement