NEWS: ሜክሲኮ ለሩሲያው የአለም ዋንጫ ትኬት ስትቆርጥ ናይጀሪያ ለተሳትፎ ቀርባለች

                                         


                                      

የሩሲያው 2018 የአለም ዋንጫ ማጣሪያ ጨዋታዎች በተለያዩ የዞን ማጣሪያዎች ተደርገዋል።

የአፍሪካ ዞን ማጣሪያ ጨዋታዎችም በአምስቱም ምድቦች ተደርገዋል።

በምድብ አንድ ሊቢያን ያስተናገደችው ጊኒ ጨዋታውን 3 ለ 2 አሸንፋለች፤ ዲሞክራቲክ ሪፐብሊክ ኮንጎን ያስተናገደችው ቱኒዚያ ደግሞ ጨዋታውን 2 ለ 1 በማሸነፍ የምድቡን መሪነት ተረክባለች።

ቱኒዚያ 9፣ ኮንጎ 6 እንዲሁም ጊኒ 3 ነጥቦችን ይዘዋል።

በምድብ ሁለት ተጠባቂውን ጨዋታ ከካሜሩን ጋር ያደረገችው ናይጀሪያ በሰፊ ውጤት በማሸነፍ ለአለም ዋንጫ ተሳትፎ ተቃርባለች።

ንስሮቹ የማይበገሩት አንበሶችን 4 ለ 0 በሆነ ውጤት ሲያሸንፉ ነጥባቸውንም 9 በማድረስ ምድቡን በርቀት መምራት ችለዋል።

በሌላ የምድቡ ጨዋታ ደግሞ ዛምቢያ አልጀሪያን አስተናግዳ 3 ለ 1 አሸንፋለች፥ ምድቡንም 4 ነጥብ በመያዝ በሁለተኝነት ትከተላለች፤ ካሜሩን 2 ነጥብ ሲኖራት አልጀሪያ በ1 ነጥብ የደረጃው ግርጌ ላይ ተቀምጣለች።

በምድብ ሶስት ደግሞ ሞሮኮ ማሊን 6 ለ 0 ስታሸንፍ ነጥቧን 5 ማድረስ ችላለች፤ ከሜዳዋ ውጭ ጋቦንን 3 ለ 0 ያሸነፈችው ኮቲዲቯር ምድቡን በ7 ነጥብ ትመራለች።

ጋቦን በ2 እንዲሁም ማሊ በ1 ነጥብ የመጨረሻወዎቹን ደረጃዎች ይዘዋል።

ደቡብ አፍሪካን ያስተናገዱት ኬፕ ቨርዲዎች ደግሞ በምድብ አራት ጣፋጭ ድል አስመዝግበዋል፤ ከመመራት ተነስተው 2 ለ 1 አሸንፈዋል።

በምድቡ ሌላ ጨዋታ ደግሞ ሴኔጋል ቡርኪና ፋሶ ያስተናገደችበት ጨዋታ ያለምንም ጎል በአቻ ውጤት ተጠናቋል።

ምድቡን ቡርኪና ፋሶ በ5 ነጥቦች ስትመራ ኮቲ ዲቯርና ደቡብ አፍሪካ በእኩል 4 ነጥብ ይከተላሉ፤ ኬፕ ቨርዲ ደግሞ በ3 ነጥብ የመጨረሻውን ደረጃ ይዛለች።

በምድብ አምስት ዩጋንዳ በሜዳዋ ግብጽን አስተናግዳ 1 ለ 0 በማሸነፍ ያልተጠበቀ ድል ማስመዝገብ ችላለች፤ የምድቡን መሪነትም ተረክባለች።

ጋና ደግሞ ኮንጎ ብራዛቪልን አስናግዳ አንድ አቻ በሆነ ውጤት ጨዋታዋን ጨርሳለች።

ምድቡን ዩጋንዳ በ7 ነጥብ ስትመራ፥ ግብጽ በ6 ትከተላለች፤ ጋና እና ኮንጎ ደግሞ ሁለት እና አንድ ነጥብ ይዘዋል።

ቀጣይ የማጣሪያ ጨዋታዎች ነገ እና ከነገ በስቲያ ሲደረጉ፥ ናይጀሪያ አሸንፋ ዛምቢያ ነጥብ ከጣለች ንስሮቹ ሁለት ጨዋታ እየቀራቸው የሩሲያ ትኬታቸውን ይቆርጣሉ።

በአውሮፓ ዞን ደግሞ፥ ዩክሬን ቱርክን 2 ለ 0፣ ስፔን ጣሊያንን 3 ለ 0 ሲያሸንፉ፥ እስራኤል ደግሞ በሜዳዋ በመቄዶንያ 1 ለ 0 ተረታለች።

ክሮሺያ ደግሞ ዛግሬቭ ላይ ኮሶቮን አስተናግዳ 1 ለ 0 ማሸነፍ ችላለች።

በሰሜን መካከለኛው አሜሪካና ካሪቢያን ምድብ ደግሞ፥ ሜክሰሲኮ ፓናማን 1 ለ 0 ስትረታ ትሪዳድና ቶቤጎ ደግሞ በሜዳዋ በሆንዱራስ 2 ለ 1 ተሸንፋለች።

ኮስታሪካን ያስተናገደችው አሜሪካም በደጋፊዋ ፊት የ 2 ለ 0 ሽንፈት ደርሶባታል።

ሜክሲኮም ሶስት ጨዋታ በሚቀረው ማጣሪያ አለም ዋንጫውን መቀላቀሏን አረጋግጣለች፤ ብራዚል፣ ኢራንና ጃፓን ደግሞ ከእርሷ ቀደም ብለው ተሳትፏቸውን ያረጋገጡ ቡድኖች ናቸው።

ምንጭ:- FBC (ኤፍ ቢ ሲ)

 

Advertisement