NEWS: የጋራ መኖሪያ ህንጻዎችን የገነቡ ከ50 በላይ ተቋራጮች የመጨረሻ ክፍያ እንዳልተፈጸመላቸው ገለጹ

                                               

በአዲስ አበባ ከመንግስት ጋር ውል በመግባት የጋራ መኖሪያ ህንጻዎችን ገንብተው ቢያስረክቡም ከሶሰት አመት በላይ የመጨረሻ ክፍያ ሳይፈጸምላቸው መቆየቱን ህንጻ ተቋራጮች ገለጹ።

ቅሬታቸውን ለፋና ብሮድካስቲንግ ኮርፖሬት ያቀረቡ ከ50 በላይ ተቋራጮች እንደሚሉት፥ በመዲናዋ በተለያዩ ክፍለ ከተሞች ህጋዊ ውል ገብተው የጋራ የመኖሪያ ህንጻዎችን ገንብተው ለማስረከብ ከመንግስት ጋር ውል ፈጽመዋል።

ችግሩ በስፋት በሚስተዋልበት የጉለሌ ክፍለ ከተማ በውላቸው መሰረት ግንባታውን አጠናቀን አስረክበናልም ነው ያሉት ተቋራጮቹ።

ይሁን እንጅ የመጨረሻው ምዕራፍ ላይ ሲደርስ የጉለሌ ክፍለ ከተማ ቤቶች ግንባታ ፕሮጀክት ቅርንጫፍ ጽህፈት ቤት ከአማካሪ ድርጅቱ ጋር በፈጠረው አለመግባባት፥ ለህንጻ ተቋራጮቹ መከፈል የሚገባው የተለያየ መጠን ያለው ገንዘብ ሳይከፈል በእንጥልጥል ይቀራል። 

የልፋታቸውን ውጤት በአግባቡ ባለማግኘታቸውም በስራ እንቅስቃሴያቸው ላይ አሉታዊ ተጽዕኖ እንዳስከተለባቸውም ነው የተናገሩት።

ገንብተው ላስረከቡት ህንጻም በተደጋጋሚ የመጨረሻ ክፍያ እንዲፈጸምላቸው ቢጠይቁም፥ ለከፍተኛ ውጣ ውረድ ተዳርገናል ይላሉ ተቋራጮቹ፤ ጠብቁ ከማለት የዘለለ ምላሽ እንዳላገኙ በመጠቆም።

ተቋራጮቹ እንደሚሉት የተዋዋሉበትን የጋራ መኖሪያ ቤት ህንጻ ሰርተው ካጠናቀቁ በኋላ፥ ከ2 መቶ 50 እስከ 3 መቶ 50 ሺህ ብር ያልተከፈላቸው የመጨረሻ ክፍያ አለ።

ለሰራተኛ ክፍያና ለተለያዩ ወጪዎች ሊጠቀሙበት የሚገባውን ገንዘብ ሊያገኙ ባለመቻላቸውም ለተጨማሪ ወጪ ተዳርገናል ነው የሚሉት።

የጉለሌ ክፍለ ከተማ ቤቶች ግንባታ ፕሮጀክት ቅርንጫፍ ጽህፈት ቤት በሰጠው ምላሽ፥ ህንጻውን በአማካሪነት ሲሰራ ከነበረ ተቋም ጋረ በተፈጠረ አለመግባባት ክፍያ መፈጸም አለመቻሉን ገልጿል።

በጽህፈት ቤቱ የቤቶች አስተዳደር የስራ ሂደት መሪ አቶ ይላቃቸው አዛናው ደግሞ፥ ከአማካሪ ድርጅቱ ጋር የተፈጠረው አለመግባባት በጽህፈት ቤቱ የሀላፊዎች መለዋወጥ ምክንያትነት በፍጥነት መፍታት አለመቻሉን ተናግረዋል።

በቤቶቹ ግንባታ ዙሪያ የአማካሪነት ሚናውን ሲወጣ የነበረው ዮሃንስ አባይ የግንባታ አማካሪ ድርጅት በበኩሉ፥ የግንባታውን የመጨረሻ ምዕራፍ የሚያረጋግጠው ወረቀት ቀሪ ክፍያ ባለመፈጸሙ ሁኔታው ረዥም ጊዜ ወስዷል ብሏል።

ዓመታትን የፈጀውን ክፍያ ቀሪ ስራ ለመፍታትም ጽህፈት ቤቱ፥ ከአማካሪ ድርጅቱ ጋር በመወያየት መግባባት ላይ መድረሱንም አቶ ይላቃቸው ገልጸዋል።

በዚህም ለሶስት ዓመታት የተጓተተው የተቋራጮቹን ክፍያ በአንድ ወር ከ15 ቀን ጊዜ ውስጥ ሙሉ በሙሉ ይፈጸማልም ነው ያሉት።

ከዚህ ባለፈ ግን በህጋዊ ውል ስራቸውን አጠናቀው የእነርሱ ባልሆነ ችግር ክፍያ ያልተፈጸመላቸውን ተቋራጮች የካሳ ጉዳይ በተመለከተ፥ የአማካሪ ድርጅቱ ሃላፊነቱን እንደሚወስድ ጽህፈት ቤቱ አስታውቋል።

በቀጣይ በሚኖሩ የግንባታ ስራዎች መሰል ችግሮች እንዳይገጥሙ አማካሪ ድርጅቶች በውላቸው መሰረት እንዲሰሩ የሚያስችል የህግ ማዕቀፍ በሀገር አቀፍ ደረጃ እየተዘጋጀ ይገኛል።

ምንጭ:- ኤፍ ቢ ሲ(FBC)

Advertisement