NEWS: የኢትዮጵያ አየር መንገድና የአሜሪካው ሴበር የአየር መንገድ ቴክኖሎጂ ኩባንያ ለ7 ዓመታት በጋራ ለመስራት ተስማሙ

                                                 

የኢትዮጵያ አየር መንገድ እና የአሜሪካው ሴበር የአየር መንገድ ቴክኖሎጂ ኩባንያ በሚቀጥሉት ሰባት ዓመታት በጋራ ለመስራት ስምምነት ተፈራርመዋል።

በስምምነቱ መስረት ኩባንያው ለተጓዦች መረጃ የሚሰጡ መተግበሪያዎችን፣ የመንገደኞች ምዝገባ፣ በአውሮፕላን ጣቢያ መንገደኞችን የማረጋገጥ ስራና በተደጋጋሚ አየር መንገዱን የሚጠቀሙ ደንበኞችን የሚመዘግቡ የቴክኖሎጂ ስርዓቶችን ይዘረጋል ተብሏል።

የኢትዮጵያ አየር መንገድ የዓለም አቀፍ አገልግሎት ማኔጂንግ ዳይሬክተር አቶ ኢሳያስ ወልደማርያም፥ አየር መንገዱ ከ1998 ዓ.ም ጀምሮ ከሴበር ቴክኖሎጂ ኩባንያ ጋር ሲሰራ መቆየቱን አስታውቀዋል።

የቴክኖሎጂ ኩባንያው ባለፉት 11 ዓመታት በአየር መንገዱ ውጤታማ ስራ መስራቱን አስታውሰው፥ ለቀጣዮቹ ሰባት ዓመታት በጋራ ለመስራት መፈራረማቸውን ተናግረዋል።

አየር መንገዱ ዋና ዋና ለሆኑ የሳይበር አገልግሎቶች በዓመት 7 ሚሊየን የአሜሪካ ዶላር እንደሚከፍል ነው የገለፁት።

በተያያዘ ዜና በናይጀሪያ አቪዬሽን ሚኒስቴር በቀረበ ጥያቄ መሰረት የኢትዮጵያ አየር መንገድ የአሪክን አየር መንገድ የማስተዳደር ፍላጎት እንዳለው ተናግረዋል።

አሪክ አየር መንገድ በገጠመው ኪሳራ ምክንያት ዕዳ ስለነበረበት የናይጄሪያ መንግስት ንብረት አስተዳደር ድርጅት ተረክቦታል።

የኢትዮጵያ አየር መንገድ አሪክን ለማስተዳደር ዝርዝር የሆኑ የድርድር ጉዳዮችን ለናይጀሪያ መንግስት አስገብቶ ምላሽ እየጠበቀ መሆኑን ጠቁመዋል።

የናይጀሪያ መንግስት ምላሽ አወንታዊ ከሆነ አየር መንገዱን ለማስተዳደር ብቃትና ፍላጎት እንዳላቸው አቶ ኢሳያስ አንስተዋል።

የአሪክ አየር መንገድ በ1992 ዓ.ም ነው የተመሰረተው።

ምንጭ:- ኤፍ ቢ ሲ(FBC)

Advertisement