NEWS: የስፖርት አበረታች ቅመሞች ወይንም ዶፒንግ በመዲናችን

                                              

ንጋቱ ሙሉ

ዘ-ጋርዲያን ጋዜጣ ቀደም ሲል እንደ አውሮፓውያን አቆጣጠር ነሐሴ 4 2017 ባወጣው የምርመራ ዘገባ ከስፖርት አበረታች ቅመሞች ወይንም ዶፒንግ ጋር በተያያዘ በአለም አቀፉ የፀረ ዶፒንግ ኤጀንሲ በወጣው የተከለከሉ መድኃኒቶችና ዘዴዎች ዝርዝር ውስጥ በቀዳሚነት የተካተተውና /EPO/ የተባለው መድኃኒት ስቴዲየም አካባቢ በሚገኘው የግሸን ፋርማሲ ያለምንም የሐኪም ትዕዛዝ በቀላሉ እንደሚሸጥና ስፖርተኞችም በቀላሉ እየገዙ ሊጠቀሙበት እንደሚችሉ መግለፁ ይታወሣል፡፡

በዘገባው ላይ የቀረቡትን መረጃዎች መነሻ በማድረግ በኢትዮጵያ ብሔራዊ የፀረ-አበረታች ቅመሞች ጽህፈት ቤትና በፌዴራልና በአዲስ አበባ የምግብ የመድኃኒትና ጤና ክብካቤ አስተዳደርና ቁጥጥር ባለሥልጣን ምርመራ በማካሄድ ላይ ነው፡፡

በዚህም መድኃኒቱ በጋዜጣው ላይ በተጠቀሰው የግሸን ፋርማሲ ውስጥ እንደሚገኝ በፍተሻ ማረጋገጥ እንዲሁም የዘ-ጋርዲያን ጋዜጠኞች በላኩት ደረሰኝ መሠረት መድኃኒቱን ከፋርማሲ መግዛታቸው ማወቅ ተችሏል፡፡

ከዚህም በተጨማሪ በጋዜጣው ላይ ፎቶግራፋቸው የታተሙ መድኃኒቶችን መለያ ቀጥር በመመርመር ፋርማሲው በደረሰኝ ያስገባቸውን መድኃኒቶች ያለ ሐኪም ትዕዛዝ መሸጡ ተረጋግጧል፡፡

በዚህም መሠረት ፋርማሲው ጥፋተኛ ሆኖ በመገኘቱ ስታዲየም የሚገኘው የግሸን ፋርማሲ ለሦስት ተከታታይ ወራት እንዲዘጋና አገልግሎት እንዳይሰጥ ቅጣት ተጥሎበታል፡፡

በተጨማሪም የቅርንጫፍ መድኃኒት ቤት ኃላፊ በመሆን ሲያገለግሉ የነበሩት አቶ ይበልጣል አድማሱ የሙያ ግዴታቸውንና ኃላፊነታቸውን በአግባቡ ያልተወጡ በመሆኑ የሙያ ፈቃዳቸው ለ6 ወራት እንዲታገድና ፈቃዳቸውን ለባለሥልጣን መሥሪያ ቤቱ እንዲመልሱ የቅጣት ውሣኔ ተላልፎባቸዋል፡፡

ምንጭ:- የሸገር FM 102.1 ሬዲዮ

Advertisement