NEWS: ሰሜን ኮሪያን በተመለከተ ሁሉም አማራጮች በጠረጴዛ ላይ ናቸው -ፕሬዚዳንት ትራምፕ

                                            

ሰሜን ኮሪያ በጃፓን ሰሜናዊ ግዛት ላይ የምትገኘውን የሆካይዶ ደሴትን ያቋረጠ ሚሳኤል ማስወጨፏን ተከትሎ የአሜሪካ ፕሬዚዳንት ዶናልድ ትራምፕ “ሁሉም አማራጮች በጠረጴዛ ላይ ናቸው” የሚል ማስጠንቀቂያ አዘል መልእክት ኣስተላልፈዋል።

በቅርብ ጊዜያት ውስጥ ፒዮንግያንግ ተደጋጋሚ የሚሳኤል ሙከራዎችን ያደረገች ሲሆን፥ የባለስቲክ ሚሳኤል ነው ተብሎ የታመነው የዛሬው ጃፓንን ማቋረጡ ግን ያልተለመደ ነው።

ዋይት ሀውስ ያወጣው የፕሬዚዳንቱ መግለጫ የዛሬው ሙከራ ለጎረቤቶች ሁሉ እና ለሁሉም የተባበሩት መንግስታት ድርጅት አባል አገራት አገሪቱ ያላትን ንቀት የሚያሳይ ነው ይላል።

ፒዮንግያንግ ይህን ድርጊቷን በገፋች ቁጥር ከዓለም ራሷን የበለጠ እያገለለች እንደምትሄድ ነው ፕሬዚዳንቱ ያመለከቱት።

ትራምፕ ከጃፓን ጠቅላይ ሚኒስትር ሺንዞ አቤ ጋርም በስልክ ተወያይተዋል።

የሰሜን ኮሪያ ጠብ ጫሪ ባህሪ ለዩናይትድ ስቴትስ፣ ለጃፓን እና ለደቡብ ኮሪያ እንዲሁም ለዓለም ቀጥተኛ ስጋት እየሆነ መምጣቱን ተስማምተዋል መሪዎቹ።

ፕሬዚዳንት ትራምፕ እና ጠቅላይ ሚኒስትር አቤ በሰሜን ኮሪያ ላይ ጫና ለማሳደግ እና ዓለም አቀፉ ማህበረሰብም ተመሳሳይ ነገር እንዲያደርግ ለማሳመን የተቻላቸውን ሁሉ ለማድረግ ተስማምተዋል።

ምንጭ:- ኤፍ ቢ ሲ(FBC)

Advertisement