NEWS: የአዲስ አበባ ከተማ የውኃ ታሪፍ ጭማሪ ፀደቀ

                                                

የአዲስ አበባ ከተማ አስተዳደር ካቢኔ የከተማው ውኃና ፍሳሽ ባለሥልጣን የውኃ ታሪፍ ጭማሪ ለማድረግ ያቀረበውን ማሻሻያ አፀደቀ፡፡

የአዲስ አበባ ውኃና ፍሳሽ ባለሥልጣን ለከተማው ነዋሪዎች ንፁህ የመጠጥ ውኃ የሚያቀርብበት ታሪፍና ውኃውን ለማምረት በሚያወጣው ወጪ መካከል የእጥፍ ልዩነት በመኖሩ፣ የታሪፍ ማሻሻያ ማድረግ ማስፈለጉ ተመልክቷል፡፡

ከባለሥልጣኑ የተገኘው መረጃ እንደሚያመለክተው አንድ ሜትር ኩብ ውኃ (አንድ ሺሕ ሊትር ውኃ) ለማምረት ከስድስት ብር በላይ ይወጣል፡፡ ነገር ግን ለኅብረተሰቡ የሚቀርበው በሦስት ብር ሒሳብ ነው፡፡

ይህ የታሪፍ ሥሌት በባለሥልጣኑ ላይ ከፍተኛ ጫና እየፈጠረ በመሆኑ፣ የታሪፍ ማሻሻያ ማድረግ ማስፈለጉን የባለሥልጣኑ ምንጮች ገልጸዋል፡፡

የታሪፍ ማሻሻያውን ለማድረግ የተለያዩ አማራጮች መታየታቸውን ምንጮች ቢገልጹም፣ የታሪፍ ጭማሪው በመቶኛ ምን ያህል እንደሆነ ግን ከመግለጽ ተቆጥበዋል፡፡

በአዲስ አበባ ከተማ አስተዳደር ከንቲባ አቶ ድሪባ ኩማ የሚመራው ካቢኔ፣ እንዲሁም በእሳቸው የሚመራው የባለሥልጣኑ ሥራ አመራር ቦርድ የቀረበውን ማሻሻያ ለረዥም ጊዜ ከመከረበት በኋላ ሰሞኑን እንዳፀደቀ ለማወቅ ተችሏል፡፡

የአዲስ አበባ ከተማ ውኃና ፍሳሽ ባለሥልጣን ይህንን የታሪፍ ማሻሻያ ለማድረግ ያቀደው በ2008 ዓ.ም. ነበር፡፡ የአዲስ አበባ ከተማ የፋይናንስና ኢኮኖሚ ልማት ቢሮ ከ2008 ዓ.ም. ጀምሮ ለሦስት ዓመታት ተግባራዊ ለማድረግ ባወጣው የመካከለኛ ዘመን የወጪ ማዕቀፍ፣ የታሪፍ ማሻሻያው እንዲፀድቅ ታሳቢ አድርጎ ነበር፡፡

ነገር ግን ባለው ነባራዊ ሁኔታ ኅብረተሰቡን ተጨማሪ ክፍያ ማስከፈልና አለማስከፈል የሚያወያይ ጉዳይ በመሆኑ፣ ንግግሩ ረዥም ጊዜ መውሰዱን መረጃዎች አመልክተዋል፡፡

በአሁኑ ወቅት ባለሥልጣኑ በአሥር ቢሊዮን ብር የተለያዩ የውኃና የፍሳሽ ግንባታዎች በማካሄድ ላይ ይገኛል፡፡

የአዲስ አበባ ውኃና ፍሳሽ ባለሥልጣን ዋና ሥራ አስኪያጅ አቶ አወቀ ኃይለ ማርያም ከሪፖርተር ጋር በነበረቸው ቆይታ እንደገለጹት፣ ባለሥልጣኑ የራሱን ወጪዎች የሚሸፍነውም ሆነ የተበደረውን ብድር የሚከፍለው ከራሱ ገቢ ነው፡፡ ‹‹ነገር ግን በአሁኑ ወቅት ገቢና ወጪው እየተመጣጠነ ባለመሆኑ ለአገልግሎት የሚያወጣውን ወጪ ማስተካከል አለበት፡፡ ይህ ካልሆነ ግን ግንባታዎችን ማካሄድ አስቸጋሪ ይሆናል፤›› ብለዋል፡፡

‹‹የታሪፍ ማሻሻያው አሁንም ቢሆን ዝቅተኛ ገቢ ያለውን የኅብረተሰብ ክፍል ታሳቢ ያደረገ ነው፤›› ሲሉ አክለዋል፡፡

ምንጭ:- ሪፖርተር

Advertisement