NEWS: ኬንያ የፕላስቲክ የእቃ መያዣዎች ጥቅም ላይ እንዳይውሉ አገደች

                                         

ኬንያ የፕላስቲክ የእቃ መያዣዎች (ፔስታሎች) በሀገሯ ውስጥ ጥቅም ላይ እንዳይውሉ ሙሉ በሙሉ ማገዷን አስታውቃለች።

ከዛሬ ጀምሮ የፕላስቲክ የእቃ መያዣዎችን (ፔስታሎችን) ሲሸጥ፣ ሲያመርት እና ይዞ የተገኘ ሰው የገንዘብ እና የእስራት ቅጣት እንደሚጠብቀውም ተነግሯል።

የፕላስቲክ የእቃ መያዣዎቹ በእጁ ላይ የተገኘ ሰውም እስከ 38 ሺህ የአሜሪካ ዶላር የገንዘብ ቅጣት እና እስከ 4 ዓመት የሚደርስ የእስር ቅጣት ሊተላለፍበት እንደሚችልም ተነግሯል።

የሀገሪቱ መንግስት እንዳስታወቀው የፕላስቲክ የእቃ መያዣዎች ላይ እግዳ የተጣለው አካባቢን ከብክለት ለመጠበቅ ነው ብሏል። 

የፕላስቲክ የእቃ መያዣዎች (ፔስታል) አምራቾች ግን መንግስት ያሳለፈው እግድ እስከ 80 ሺህ የሚደርሱ የሀገሪቱ ዜጎን ስራ አጥ ያደርጋል እያሉ ነው።

ሆኖም ግን የሀገሪቱ ፍርድ ቤት ክልከላውን በመቃወም የቀረበውን አቤቱታ ውድቅ ማድረጉም ተሰምቷል።

ኬንያ የትላስቲክ የእቃ መያዣዎች ጥቅም ላይ እንዳውል በተለያዩ ጊዜያት ለመከለክል ሙከራ ያደረገች ሲሆን፥ ባለፉት 10 ዓመታት ውስጥም የዘንድሮውን ጨምሮ ለሶስተኛ ጊዜ ነው ያገደችው።

አብዛኛው ኬንያውያንም ክልከላውን እንደሚደግፉ ነው በብዛት እየተነገረ ያለው።

ከውጭ ሀገራት ወደ ኬንያ የሚገቡ ሰዎችም ቢሆኑ ይዘውት ያለውን ማንኛውንም የፕላስቲክ የእቃ መያዣ አውሮፕላን ማረፊያ ውስጥ ትተው እንዲወጡ እንደሚደረግም ነው የተገለፀው።

የሀገሪቱ መንግስት ክልከላውን ተግባራዊ ከማድረጉ በፊትም የ6 ወራት ጊዜ ሰጥቶ እንደነበርም ተነግሯል።

ኬንያውያን በየወሩ 24 ሚሊየን የፕላስቲክ የእቃ መያዣዎችን እንደሚጠቀሙ ይገመታል።

ሩዋንዳ፣ ደቡብ አፍሪካ እና ኤርትራን ጨምሮ የተወሰኑ የአፍሪካ ሀገራት የፕላስቲክ የእቃ መያዣዎች በሀገራቸው ጥቅም ላይ እንዳይውል መከልከላቸውም ይታወሳል።

ምንጭ:- ኤፍ ቢ ሲ(FBC)

Advertisement