NEWS: ጉግል ተጠቃሚዎቹ ከድብርት ጋር የተያያዙ የጤና ምርመራዎችን በራሳቸው የሚያደርጉበትን አሰራር ጀመረ

                                                 

ግዙፉ የመረጃ ማፈላለጊያ ገጽ ጎግል ተጠቃሚዎቹ በሞባይል ማፈላለጊያ አማካይነት ስለ ድብርት ስሜት የጤና ጥያቄያዊ ምርምራ የሚያደርጉበትን አሰራር በአሜሪካ ተግባራዊ አድርጓል።

ተጠቃሚዎቹ በሞባይል የማፈላለጊያ ገፃቸው ላይ “እውን የድብርት ስሜት በውስጤ አለ ወይ” የሚልና ሌሎች 9 ጥያቄዎችን በመጠየቅ ከቴክኖሎጂው የምርምራ ክፍል ጋር በራሳቸው ጊዜ ስነልቦናዊ ህክምናዎችን ማድረግ ይችላሉ።

ጎግል ይህን የመተግበሪያ ማሻሻያ ያደረገው ከአዕምሮ ህሙማን ማህበር ጋር በደረሰው ስምምነት መሰረት ነው።

ኩባንያው በመረጃ ማፈላለጊያ ገፁ ላይ ለመጀመሪያ ጊዜ የአዕምሯዊ ጤና ክትትል አሰራርን ተግባራዊ ማድረግ ችሏል።

በአሜሪካ የሚገኙ የጎግል ተጠቃሚዎች ስለአዕምሯዊ ችግሮች መረጃዎችን በሚፈልጉበት ጊዜ፥ “ለድብርት ተጋላጭ ከሆኑ እባክዎን ራስዎን ይመርምሩ” የሚል ገፅ ወዲያወኑ እንደሚደርሳቸው ነው የተነገረው።

በመቀጠል የመጣውን የገፅ ማስፈንጠሪያ በመጫን 9 አጫጭርና ድንገተኛ ጥያቄዎች ሲመጡላቸው፥ ምን አይነት ችግር እንዳለባቸውና ምን ማድረግ እንደሚገባቸው በየደረጃው ምላሽ ያገኛሉ።

ጥያቄዎቹ ፒ ኤች ኪው-9 የሚል መጠሪያ ያላቸው ሲሆን፥ የድብርት ስሜትን ለማወቅ ከፍተኛ ውጤት የታየባቸው ሲሆኑ ከብሪታኒያ ብሔራዊ የጤና መምሪያ የድብርት መለያ ስልቶች ጋር ተቀራራቢ መሆናቸው ነው የተጠቆመው።

ይህ የድብርት ህመምን በጎግል አማካይነት ባሉበት ሆነው የመመርመሪያ ገፅ በአሁኑ ወቅት በአሜሪካ ተግባራዊ ሆኗል።

ሙከራው ስኬታማ ከሆነ ጉግል ማሻሻያውን በብሪታኒያም እንደሚጀምር ተጠቁሟል።

አገልግሎቱ በርካታ ሰዎች ስለድብርት ምንነትና ስለ ጉዳቱ ግንዛቤ እንዲኖራቸው በማድረግ ለጥንቃቄ እንደሚያግዛቸውና ህይወትን የተሻለ ለማድረግ እንደሚጠቅም ተነግሯል።

ምንጭ:- ኤፍ ቢ ሲ(FBC)

Advertisement