NEWS: በሚቀጥሉት 10 ቀናት በክረምት ዝናብ ተጠቃሚ አካባቢዎች የዝናቡ ስርጭት ይቀጥላል

                                      

 በሚቀጥሉት 10 ቀናት ዝናብ ሰጪ የሚቲዎሮሎጂ ክስተቶች በክረምት ዝናብ ተጠቃሚ አካባቢዎች ላይ እንደሚቀጥል የብሄራዊ ሚቲዎሮሎጂ ኤጀንሲ አስታወቀ።

ኤጀንሲው ከሰሜንና ከሰሜን ምስራቅ ስፍራዎች ወቅታዊ ዝናብ እየቀነሰ እንደሚሄድ ገልጿል።

በፀሃይ ኃይል ታግዞ ከሚፈጠረው ጠንካራ የደመና ክምችት ጋር ተያይዞ በአንዳንድ ቦታዎች ላይ በረዶና ነጎድጓድ የቀላቀቀለ ከባድ ዝናብ ይጠበቃል ብሏል።

በሚቀጥሉት ቀናት በትግራይ፣ ጋምቤላ፣ ቤንሻንጉል ጉሙዝ፣ ከአማራ ክልል ሰሜንና ደቡብ ጎንደር፣ አዊ፣ ምዕራብና ምስራቅ ጎጃም፣ ባህዳር ዙሪያ፣ ሰሜንና ደቡብ ወሎ ዞኖች፣ ከኦሮሚያ ምስራቅና ምዕራብ ወለጋ፣ ጅማ፣ ኢሉአባቦራ፣ ምስራቅና ምዕራብ ሸዋ፣ አርሲና ባሌ ዞኖች እንዲሁም አዲስ አበባ በአብዛኛው መደበኛ በጥቂት ቦታዎች ደግሞ ከመደበኛ በላይ ዝናብ ይኖራቸዋል።

በተመሳሳይ ከደቡብ ክልል ሀድያ፣ ጉራጌ፣ ወላይታ፣ ከፋ፣ ቤንች ማጂ፣ ሲዳማና ጌዴኦ ዞኖች በአብዛኛው መደበኛ በጥቂት ቦታዎች ላይ ከመደበኛ በላይ ዝናብ እንደሚያገኙ ኤጀንሲው አመልክቷል።

ምዕራብና ምስራቅ ሐረርጌ፣ ድሬዳዋና ሐረር፣ አፋር፣ ከሶማሌ ክልል ጅግጅጋና ሲቲ ዞኖች በተጨማሪም ከደቡብ ክልል የሰገን ሕዝቦች መደበኛና በጥቂት ቦታዎች ላይ ከመደበኛ በታች ዝናብ እንደሚያገኙም ይጠበቃል።

በትንበያው መሰረት በሚቀጥሉት ቀናት የመኸር ሰብል አምራች በሆኑትም ሆነ በክረምት ዝናብ ተጠቃሚ አካባቢዎች የእርጥበት ሁኔታው የበለጠ እንደሚሻሻል ኤጀንሲው ገልጾ አብዛኛው ኦሮሚያ፣ አማራ፣ የትግራይና የደቡብ፣ የጋምቤላና የቤንሻንጉል ጉሙዝ ክልሎች የተሻለ እርጥበት ይኖራቸዋል።

ከመደበኛ በላይ ዝናብ በሚጠበቅባቸው አካባቢዎች በአንዳንድ ቦታዎች ላይ እርጥበቱ ከመጠን በላይ ሊሆን ስለሚችል ውሃ ማሳ ላይ እንዳይተኛ ቦይ በማውጣት የማንጠፍጠፍና የመከላከል ተግባር ሊከናወን እንደሚገባ ኤጀንሲው አሳስቧል።

በዝቅተኛ ቦታዎች ላይ በሚገኙ የእርሻ ማሳዎች ላይ የጎርፍ አደጋ እንዳይከሰት መፋሰሻዎችን ከወዲሁ ከማዘጋጀት ባለፈ ነባር መፋሰሻዎች አለመደፈናቸውን የማረጋገጥ ተግባራት ከወዲሁ ሊሰሩ እንደሚገባ ኤጀንሲው አስገንዝቧል።

በሌላ በኩል አንስተኛ ዝናብ እንደሚያገኙ የሚጠበቁ አካባቢዎች የእርጥበት እጥረት እንዳይገጥማቸው የሚገኘውን እርጥበት መጠቀም ይኖርባቸዋል ሲል ኤጀንሲው አስገንዝቧል።

ምንጭ:- ኤፍ ቢ ሲ(FBC)

Advertisement