NEWS: ጆሮ በጫጫታ ውስጥ መልዕክቶችን በግልፅ ካደመጠ የአዕምሯዊ ጤንነት ምልክት ነው ተባለ

                                                                       

የሰው ልጅ በጆሮው አማካይነት የድምፅ መልዕክቶችን ሲያስተናግድ የሚውል ቢሆንም መልዕክቶችን በግልፅ ለማዳመጥ ሁከት ባይኖር የአብዛኛው ህዝብ ምርጫ መሆኑን ጥናቶች ያሳያሉ።

የኦክስፎርድ፣ የፖርቶ፣ የዌስት ሚኒስትር፣ የዱርሃምና የለንደን ዩኒቨርሲቲዎች በጋራ ይፋ ባደረጉት ጥናት ጆሮ በድምጽ ሁከት ውስጥ መልዕክቶችን ለይቶ ካዳመጠ የሰዎች አዕምሯዊ ጤንነት መልካም መሆኑን እንደሚያሳይ አመላክቷል።

ከየዩኒቨርሲቲዎቹ የተውጣጡ ተመራማሪዎች በተዘበራረቀ የድምፅ ፍሰት ውስጥ ቃላትና ሀረጋትን አገጣጥመው ሙሉ መልዕክትን ማዳመጥ መቻል የአዕምሯዊ ጤንነት ደረጃን ለመለካት ያለውን ሚና ተንትነዋል።

ድምፆችን በአግባቡ የሚሰሙ ሰዎች አንጎል የፈጠነ ምላሽ የሚሰጥና ትኩረት የማድረግ አቅሙ ከፍተኛ መሆኑ በጥናቱ ሂደት በኤም አር አይ ምርመራ ተረጋግጧል።

ከዓለም ህዝብ 15 በመቶ ያህሉ ድምፅን ለይቶ ትርጉም በሚሰጥ መልኩ የሚሰማው ሁከት በማይኖርበትና በቅርበት በሚሆንበት ጊዜ ነው።

የድምፆች መደራረብና መዘበራረቅ በሚከሰትባቸው ቦታዎች መልዕክቶችን አጣርቶ ማዳመጥ የሚሳናቸውና ግራ የሚጋቡ ሰዎች ለአዕምሮ ጤና መዛባት ችግር የመጋለጣቸው ፍንጭ መሆኑን ተመራማሪዎች ጠቅሰዋል።

በተለይም የጆሮ ድምፆችን አጣርቶ ትክክለኛውን ትርጉም በሚሰጥ መልኩ ወደ አዕምሯቸው የማድረስ ችሎታ ወደፊት በጤናው ዘርፍ ለሚደረግ የአዕምሮ ህክምና የመነሻ ግኝት እንደሚሆን ነው የተጠቆመው።

በጥናቱ የተሳተፉ ሰዎች ከጫጫታ ውስጥ ቃላትን መርጠው የማዳመጥ ችሎታቸው እንዲለካ ተደርጓል።

በዚህም መሰረት 75 በመቶ የሚሆኑ ተሳታፊዎች በድምፅ ሁከቱ ውስጥ የተነገሩ ዓረፍተ ነገሮችን በጉልህ መስማታቸው ተረጋግጧል።

ፕሮፌሰር ሶፊ ስኮት በለንደን ዩኒቨርሲቲ ኮሌጅ የንግግር ተግባቦት ቤተ ሙከራ ተመራማሪ ሲሆኑ፥ በተዘበራረቀ የድምፅ ፍሰት ውስጥ መልዕክትን ለይቶ የመስማትና የማውጣት ግኝቱ የሰዎቹን አዕምሯዊ ጤንነት ይመሰክራል ብለዋል።

ምንጭ:- ኤፍ ቢ ሲ(FBC)

 

Advertisement